Prezident İlham Əliyevin Özbəkistanın Milli İnformasiya Agentliyinə verdiyi geniş müsahibə bir daha sübut etdi ki, Azərbaycan ilə Mərkəzi Asiya dövlətləri arasında formalaşan strateji xətt uzunmüddətli və sarsılmaz əsaslara dayanır. Dövlət başçısının fikirləri göstərir ki, bölgədə baş verən bütün mühüm siyasi və iqtisadi proseslər bu əməkdaşlıq fonunda daha sabit və davamlı şəkildə inkişaf edir. Azərbaycan ilə Özbəkistan arasındakı münasibətlər yalnız qarşılıqlı etimadın deyil, həm də regionun gələcəyinə yönəlmiş ortaq vizyonun məhsuludur.

Müsahibədə xüsusilə vurğulanan məqam ondan ibarətdir ki, Azərbaycan və Mərkəzi Asiya ölkələrini birləşdirən dəyərlər təkcə coğrafi yerləşmə ilə məhdudlaşmır. Xəzər dənizi bu gün region dövlətləri üçün strateji enerji və logistika qovşağı olmaqla yanaşı, eyni zamanda ortaq mənəvi bağların da təcəssümüdür. Azərbaycanın Mərkəzi Asiya Dövlət Başçılarının Məşvərət görüşlərində fəal iştirakı, siyasi dialoqun davamlılığı və yüksək səviyyəli qarşılıqlı anlaşma regional əməkdaşlığın vacib sütununa çevrilib.

Azərbaycan–Özbəkistan münasibətləri isə bu əməkdaşlığın ən önəmli istiqamətlərindən biridir. Hər iki ölkə liderinin şəxsi dostluğu, müttəfiqlik haqqında imzalanan sənədlər və intensiv səfərlər siyasi əlaqələri yeni mərhələyə çıxarıb. Özbəkistanın Qarabağın bərpasına verdiyi qardaş dəstəyi, Füzulidə məktəbin inşası və humanitar təşəbbüslər yalnız dövlətlərarası münasibətlərin deyil, xalqlar arasındakı səmimiyyətin və qardaşlığın göstəricisidir.

İqtisadi əlaqələrin genişlənməsi isə qarşıdakı illər üçün ən prioritet istiqamətlərdən biri kimi qiymətləndirilir. 2025-ci ildə ticarət dövriyyəsinin kəskin artımı, Orta Dəhliz layihəsində fəal əməkdaşlıq və birgə infrastruktur təşəbbüsləri münasibətlərin strateji mahiyyətini daha da gücləndirir. Mədəniyyət günlərinin təşkili, qardaşlaşmış şəhərlərin əməkdaşlığı və birgə idman tədbirləri isə bu çoxşaxəli tərəfdaşlığın humanitar təməllərini möhkəmləndirir. Bütün bu faktlar göstərir ki, Azərbaycan–Özbəkistan münasibətləri regionun gələcək inkişaf modelinin mühüm komponentidir.

İlham Həsənov

YAP Şuşa rayon təşkilatının 26 saylı ərazi partiya təşkilatının sədri