Daşkənddə keçirilən Mərkəzi Asiya Dövlət Başçılarının Məşvərət Görüşündə Azərbaycanın bu formata tamhüquqlu şəkildə qəbul edilməsi Avrasiyada geosiyasi balansın yenidən formalaşmasına səbəb olan mühüm hadisə kimi dəyərləndirilir. Bu qərar bölgədə yaranan yeni əməkdaşlıq xəttinin yalnız protokol səviyyəli deyil, dərin strateji məzmun daşıdığını göstərir. Azərbaycanı bu platformaya daxil edən məntiq, ortaq iqtisadi maraqlar, güclənən nəqliyyat əlaqələri, enerji təhlükəsizliyinə dair regional yanaşmalar və qarşılıqlı siyasi etimadın nəticəsidir.

Uzun illərdən bəri Azərbaycan və Mərkəzi Asiya ölkələri arasında davamlı olaraq genişlənən əməkdaşlıq xətti ticarət dövriyyəsi, tranzit dəhlizləri, enerji kəmərləri, mədəni təmaslar və çoxşaxəli diplomatik əməkdaşlıq vasitəsilə möhkəmlənmişdi. Bu proses zamanla institusional çərçivəyə ehtiyac doğurdu və Daşkənddə qəbul olunan qərar həmin ehtiyacın məntiqi nəticəsi kimi meydana çıxdı. Azərbaycan artıq dəvət olunan tərəf deyil, bütün qərarların formalaşmasında söz sahibi kimi qəbul olunan bərabərhüquqlu üzvdür.

Bu addım regionda uzunmüddətli strateji sabitliyin yaranmasına, iqtisadi əlaqələrin daha sistemli şəkildə idarə edilməsinə və regional təşəbbüslərin daha koordinasiyalı həyata keçirilməsinə imkan verəcək. Azərbaycanın bu formatda iştirakı həm Şərqlə Qərb arasında dayanıqlı tranzit əlaqəsinin genişlənməsinə, həm də Avrasiyanın iqtisadi xəritəsində yeni inteqrasiya mərkəzinin formalaşmasına xidmət edir. Daşkənd qərarı bütövlükdə regionun gələcək inkişaf modelini müəyyənləşdirən əsas hadisələrdən biri kimi tarixə düşür.

Elçin Dadaşov

YAP Şuşa rayon təşkilatının 4 saylı ərazi partiya təşkilatının sədri