Azərbaycanın regionlarında həyata keçirilən sosial-iqtisadi inkişaf proqramları son illərdə keyfiyyətcə yeni səviyyəyə yüksəlib. İnfrastruktur sahəsində — o cümlədən elektrik enerjisi, yol-nəqliyyat, su təchizatı və sosial obyektlər üzrə — genişmiqyaslı layihələrin reallaşdırılması regionların simasını dəyişib. Prezident İlham Əliyevin Naxçıvanda yeni təyinatlarla bağlı keçirilən qəbulda bu istiqamətlərə xüsusi diqqət ayırması görülən işlərin həm miqyasını, həm də davamlılığını vurğulayıb. Dövlət başçısı qeyd edib ki, ölkənin bütün bölgələrində əsas infrastruktur layihələri artıq başa çatmaq üzrədir.

Bu genişmiqyaslı layihələr insanların rahatlığını təmin etməklə yanaşı, regionların iqtisadi potensialını artırır. Yeni yollar, bərpa olunan enerji xətləri, müasir su və suvarma sistemləri kənd təsərrüfatı, sənaye və turizmin inkişafına zəmin yaradır. Prezident İlham Əliyevin vurğuladığı kimi, dövlət investisiyaları yalnız bugünkü ehtiyacları deyil, gələcək inkişafın strateji əsaslarını formalaşdırır. Bu baxımdan yerli rəhbərlərin qarşısında duran əsas vəzifə mövcud imkanlardan səmərəli istifadə etmək və hər bir layihənin real nəticə ilə tamamlanmasını təmin etməkdir.

Bölgələrdə sosial-iqtisadi dinamikanın qorunub saxlanılması üçün yeni təyinatlar mühüm rol oynayır. Yerli rəhbərlər dövlət siyasətinin icrasında birbaşa iştirak edən əsas fiqurlardır. Onların fəaliyyətinin effektivliyi isə həm iş yerlərinin yaradılması, həm sahibkarlığa dəstək verilməsi, həm də əhalinin sosial tələbatlarının qarşılanması ilə ölçülür. Prezidentin bölgələrə yönəlmiş mesajı göstərir ki, yeni mərhələ artıq başlanıb və bu mərhələdə əsas hədəf sosial rifahın daha da yüksəldilməsi olacaq.

Rəfail Məmmədov

YAP Şuşa rayon təşkilatının fəal üzvü