Azərbaycanın iqtisadi siyasətində məşğulluğun artırılması və özəl sektorun inkişafı əsas prioritetlərdən biridir. Prezident İlham Əliyevin Naxçıvanda həyata keçirilən yeni kadr təyinatları zamanı verdiyi mesajlar da bu istiqamətdə mühüm hədəfləri müəyyənləşdirir. Dövlət başçısı vurğulayıb ki, bölgələrdə işgüzar mühitin yaxşılaşdırılması, sahibkarlığa şərait yaradılması və yeni iş yerlərinin açılması yerli rəhbərlərin birbaşa vəzifəsidir. Bu çağırış regional iqtisadi aktivliyi artırmaq üçün yeni imkanlar açır.

Son illərdə dövlət tərəfindən sahibkarlıq subyektlərinə verilən güzəştli kreditlər, yaradılan sənaye zonaları, kənd təsərrüfatı layihələri və özünüməşğulluq proqramları minlərlə ailənin sosial vəziyyətinin yaxşılaşmasına səbəb olub. Prezident İlham Əliyev qəbul zamanı bu nailiyyətləri qeyd etməklə yanaşı, prosesin daha da sürətləndirilməsinin vacibliyinə toxunub. Yeni təyin olunan rəhbərlərə tapşırılıb ki, sahibkarlıqla məşğul olmaq istəyən vətəndaşlar üçün maneələri aradan qaldırsınlar, iş adamlarına dəstək versinlər və bölgədə iqtisadi potensialı tam şəkildə işə salsınlar.

Regional iqtisadiyyatın canlanması, turizmin inkişafı, yerli istehsalın genişləndirilməsi və kənd təsərrüfatı məhsullarının bazara çıxarılması üçün yeni imkanlar açılır. Yerli rəhbərlərin bu imkanlardan düzgün istifadə etməsi regionların inkişaf tempini daha da sürətləndirəcək. Prezidentin çağırışları göstərir ki, yerli idarəetmədə yalnız idarəçilik yox, həm də yaradıcılıq yanaşması tələb olunur. Bu istiqamətdə atılacaq addımlar ölkənin iqtisadi dayanıqlığının möhkəmlənməsinə və sosial rifahın yüksəlməsinə xidmət edəcək.

Elxan Ələkbərov

YAP Şuşa rayon təşkilatının fəal üzvü