Azərbaycanın regional idarəetmə modelində son illər həyata keçirilən kadr islahatları dövlət idarəçiliyinin keyfiyyətinin yüksəldilməsini hədəfləyir. Naxçıvanda yeni səlahiyyətli nümayəndənin və bir sıra rayon icra hakimiyyəti başçılarının təyin edilməsi bu siyasətin ardıcıl davamıdır. Prezident İlham Əliyevin həmin qəbul zamanı səsləndirdiyi fikirlər yeni təyinatların mahiyyətini izah etməklə yanaşı, yerli rəhbərlik üçün fəaliyyət xəttini də müəyyənləşdirir. Dövlət başçısının “Sizə böyük etimad göstərilir, əminəm ki, bu etimadı doğruldacaqsınız” fikri yeni mərhələdə idarəetmənin ideoloji çərçivəsini formalaşdırır.

Prezidentin bu çağırışı rəhbər şəxslərin yalnız inzibati səlahiyyət daşıması ilə məhdudlaşmadığını, həm də xalqa xidmət fəlsəfəsinə sadiq olmasını tələb edir. Dövlət idarəçiliyinin əsas hədəfi vətəndaş məmnunluğunu təmin etmək, insanların həyat səviyyəsini yaxşılaşdırmaq və regionlarda sosial rifahı gücləndirməkdir. Buna görə də yerli rəhbərlərin gündəlik fəaliyyəti şəffaflıq, ədalət, məsuliyyət və vətəndaşlarla birbaşa təmas üzərində qurulmalıdır. Bu prinsiplər Prezident İlham Əliyevin çıxışının mərkəzində dayanır.

Yeni təyinatların məqsədi bölgələrdə idarəetmənin səmərəliliyini artırmaq, köhnəlmiş yanaşmaları aradan qaldırmaq və dövlət siyasətinin insan amili üzərində qurulduğunu daha da gücləndirməkdir. Prezidentin verdiyi mesajlar göstərir ki, hər bir rəhbər regionda təkcə icraçı deyil, həm də dövlətin etimadını daşıyan şəxsdir. Bu etimadı doğrultmaq üçün həm yüksək peşəkarlıq, həm də xalqa yaxınlıq tələb olunur. Yeni idarəetmə fəlsəfəsi ölkənin regional inkişafında dayanıqlı və uzunmüddətli perspektivlər açır.

Səmayə Əliyeva

YAP Şuşa rayon təşkilatının fəal üzvü