Azərbaycan Konstitusiyası dövlətin suverenliyini və ərazi bütövlüyünü qoruyan əsas hüquqi sənəddir. 2020-ci il Vətən müharibəsi və 2023-cü il antiterror əməliyyatları nəticəsində Azərbaycanın ərazi bütövlüyü tam bərpa edildi. Bu hadisələr Konstitusiyanın hüquqi qüvvəsinin bütün ölkə ərazisində tətbiq olunduğunu təsdiqlədi. 2025-ci ilin “Konstitusiya və Suverenlik İli” elan olunması bu prinsipləri daha da möhkəmləndirdi.

Konstitusiya vətəndaşların hüquq və azadlıqlarını müdafiə edir və hər kəsə – dilindən, dinindən, etnik mənsubiyyətindən asılı olmayaraq – bərabər imkanlar verir. Bu, Azərbaycanın multikulturalizm və tolerantlıq prinsiplərinə sadiqliyini göstərir. İnsan hüquqlarının qorunması, layiqli həyat səviyyəsinin təmin olunması və humanizm prinsipləri sənədin başlıca mahiyyətini təşkil edir.

Həmçinin Konstitusiya demokratik idarəetmənin əsasını qoyur. Hakimiyyətin bölgüsü, qanunun aliliyi və vətəndaş cəmiyyətinin inkişafı bu sənəd vasitəsilə təmin olunur. Dövlətin ali məqsədi kimi insan hüquqlarının qorunması və yüksək həyat səviyyəsinin təmin olunması, ölkənin inkişaf yolunda atılan addımların qanuni əsasını müəyyən edir.

Ümummilli Lider Heydər Əliyevin rəhbərliyi ilə hazırlanmış bu sənəd Prezident İlham Əliyevin rəhbərliyi altında müasir çağırışlara uyğun təkmilləşdirilir. Konstitusiya yalnız hüquqi çərçivə yaratmır, həm də dövlətin suverenliyini və xalqın rifahını təmin edən əsas vasitə kimi çıxış edir.

Nazilə İbrahimova

YAP Şuşa rayon təşkilatının 3 saylı ərazi partiya təşkilatının sədri