Azərbaycan xalqı üçün 9 Noyabr sadəcə təqvimdəki bir tarix deyil, dərin mənəvi və tarixi anlam daşıyan müqəddəs gündür. 1918-ci ildə Azərbaycan Xalq Cümhuriyyəti tərəfindən qəbul edilən üçrəngli bayraq millətin azadlıq ideallarını, milli kimliyini və gələcəyə inamını özündə əks etdirdi. O dövrdə qəbul edilən qərar təkcə dövlət atributunun yaradılması deyil, xalqın özünü dərk etməsinin, mədəni yüksəlişinin və müstəqillik arzusunun təntənəsi idi. Bayrağın rəngləri – mavi, qırmızı və yaşıl – xalqımızın mənəvi köklərini, müasir inkişaf yolunu və dini-mədəni dəyərlərinə sədaqətini ifadə edir.

Azərbaycanın müstəqillik tarixində üçrəngli bayraq bir çox sınaqlardan keçdi. Cümhuriyyətin süqutundan sonra bu bayraq xalqın qəlbində gizli bir ümid kimi yaşadı. 1990-cı ildə Naxçıvanda Ulu Öndər Heydər Əliyevin təşəbbüsü ilə üçrəngli bayrağımız yenidən qaldırıldıqda, bu hadisə milli dirçəlişin başlanğıcını qoydu. Ulu Öndərin “Azərbaycan bayrağı sadəcə bir parça deyil, o, bizim tariximiz və qürurumuzdur” kəlamı bu rəmzin mənəvi dəyərini bir daha vurğuladı.

Bu gün Prezident İlham Əliyevin rəhbərliyi ilə üçrəngli bayrağımız dünyanın müxtəlif qitələrində, beynəlxalq təşkilatlarda və Qarabağ səmasında dalğalanır. 2020-ci ilin Zəfər Günündə Şuşada ucaldılan bayraq Azərbaycan xalqının əzmini, şəhidlərimizin qanı ilə qazanılmış azadlığı simvolizə etdi. Bayrağımız indi azad, müstəqil və qalib Azərbaycanın rəmzidir.

Əminə Məhərrəmova

YAP Şuşa rayon təşkilatının 32 saylı ərazi partiya təşkilatının sədri