Azərbaycanın 2020-ci ildə qazandığı Böyük Zəfər təsadüfi nəticə deyildi, uzun illər ərzində aparılan məqsədyönlü siyasətin nəticəsi idi. 1993-cü ildə Ümummilli Lider Heydər Əliyevin hakimiyyətə qayıdışından sonra dövlətin bütün sahələrində sabitlik təmin olundu, ordu quruculuğu yeni mərhələyə qədəm qoydu. Həmin dövrdə dövlətin əsas məqsədi müstəqilliyi qorumaq və gələcəkdə ərazi bütövlüyünü bərpa etmək üçün möhkəm təməl yaratmaq idi. Hərbi, iqtisadi və diplomatik istiqamətlərdə görülən tədbirlər 1990-cı illərin xaotik mühitindən çıxışın əsasını qoydu.

Prezident İlham Əliyev bu siyasəti müasir dövrün tələblərinə uyğunlaşdıraraq ardıcıl şəkildə davam etdirdi. Onun rəhbərliyi dövründə iqtisadi artım təmin olundu, enerji layihələri həyata keçirildi, ordunun maddi-texniki bazası müasirləşdirildi. Dövlət büdcəsində müdafiə xərcləri artırıldı, hərbçilərin hazırlığı və təminatı üçün geniş imkanlar yaradıldı. Xarici siyasətdə isə Azərbaycan balanslı və müstəqil mövqe tutdu, beynəlxalq nüfuzunu gücləndirdi. Bu strategiya həm daxildə siyasi sabitliyi möhkəmləndirdi, həm də ölkəni hərbi-siyasi baxımdan hazır vəziyyətə gətirdi.

Nəticə olaraq, 2020-ci ilin payızında başlayan 44 günlük Vətən müharibəsində Azərbaycan dövləti bütün potensialını bir məqsəd uğrunda səfərbər edə bildi. Ordunun hazırlığı, diplomatik fəaliyyət və xalqın birliyi bir araya gələrək tarixi nəticə verdi. 8 noyabrda Şuşanın azad olunması ilə ərazi bütövlüyü bərpa olundu, 9-10 noyabr gecəsi imzalanan üçtərəfli bəyanatla Ermənistan kapitulyasiya etdi. Bu Qələbə dövlətin uzunmüddətli planlı siyasətinin və Prezident İlham Əliyevin qətiyyətli liderliyinin real göstəricisi oldu.

Rəfail Məmmədov

YAP Şuşa rayon təşkilatının fəal üzvü