8 Noyabr – Zəfər Günü Azərbaycan tarixinin ən qürurlu səhifəsidir. 2020-ci ilin 8 noyabrında Şuşanın azad olunması ilə nəticələnən Vətən müharibəsi təkcə hərbi uğur deyil, həm də milli həmrəyliyin və dövlət gücünün parlaq təcəssümüdür. Bu qələbə əsrlərlə yadda qalacaq tarixi dönüş nöqtəsinə çevrildi.

Vətən müharibəsi otuz illik işğalın sonu, ədalətin və beynəlxalq hüququn bərpası idi. Ermənistanın 1990-cı illərdə həyata keçirdiyi işğalçılıq siyasəti nəticəsində torpaqlarımızın 20 faizi zəbt olunmuş, yüz minlərlə soydaşımız qaçqın düşmüşdü. Azərbaycan bu ədalətsizliyi sükutla deyil, dövlət quruculuğu və güclü ordu ilə cavab verdi.

Prezident İlham Əliyevin rəhbərliyi ilə illərlə aparılan məqsədyönlü siyasət nəticəsində Azərbaycan XXI əsrin regional liderinə çevrildi. 2020-ci ilin payızında isə bu güc “dəmir yumruq” kimi birləşərək düşməni məğlub etdi. Şuşanın azad edilməsi həmin qələbənin tacı oldu.

Şuşa uğrunda döyüşlər dünya hərb tarixində misilsiz qəhrəmanlıq nümunəsi kimi qaldı. Əsgərlərimiz qayalara dırmaşaraq, əlbəyaxa döyüşlərlə şəhəri düşməndən təmizlədi. Bu döyüşlərdə qazanılan qələbə təkcə bir şəhərin deyil, bir millətin ruhunun qələbəsi idi.

Bu gün Zəfər Günü təkcə xatirə deyil, həm də gələcəyə inamın, milli birliyin və dövlət iradəsinin bayramıdır. Hər bir azərbaycanlı üçün bu gün azadlığın, suverenliyin və qürurun əbədiyyət simvoludur.

Rəsmiyyə Məmmədova

YAP Şuşa rayon təşkilatının 16 saylı ərazi partiya təşkilatının sədri