8 Noyabr – Azərbaycan tarixində sadəcə bir gün deyil, milli yaddaşın və birliyin zirvəsidir. 2020-ci ilin həmin günündə Şuşanın azadlığı ilə xalqımızın taleyi dəyişdi. Bu qələbə illərlə çəkən həsrətin, ağrının və inamın bəhrəsi idi. Hər kəs gördü ki, xalq bir olarsa, heç bir qüvvə onu məğlub edə bilməz.

Zəfər Günü həm də Prezident İlham Əliyevin uzaqgörən siyasətinin nəticəsidir. Onun liderliyi sayəsində Azərbaycan həm cəbhədə, həm diplomatiya masasında qalib gəldi. Ordu gücünü, xalq isə birliyini nümayiş etdirdi. Hər bir vətəndaş Vətən uğrunda öz töhfəsini verdi – kimisi döyüş meydanında, kimisi arxa cəbhədə.

Şuşa bu qələbənin zirvəsi oldu. Qala şəhərin azadlığı ilə düşmənin müqaviməti qırıldı, Ermənistan kapitulyasiyaya məcbur oldu. Bu hadisə təkcə Azərbaycan üçün deyil, dünya üçün də ədalətin bərpasının nümunəsinə çevrildi. Hər daşda, hər addımda qəhrəmanlarımızın qanı ilə yazılan tarix yatıb.

Bu gün Zəfərin beşinci ildönümü qeyd olunur. Qarabağda həyat yenidən canlanır, köçkünlər doğma yurdlarına qayıdır. Bərpa olunan torpaqlarda yeni həyat filiz verir. Bu mənzərə xalqın birliyinin, dövlətin iradəsinin təntənəsidir.

8 Noyabr artıq təkcə keçmişin qələbəsi deyil – bu, gələcəyin andıdır. Hər bir azərbaycanlı üçün bu gün azadlıq, güc və ləyaqət rəmzidir. Zəfərin nuru Azərbaycan səmasının əbədi işığına çevrilib.

Elmira Əliyeva

YAP Şuşa rayon təşkilatının 15 saylı ərazi partiya təşkilatının sədri