Şuşa şəhəri Azərbaycanın mədəniyyət və tarix paytaxtı kimi hər bir vətəndaş üçün xüsusi mənaya malikdir. 1992-ci ildə şəhərin işğalı xalqın yaddaşında dərin iz buraxdı. Onilliklər boyu bu ədalətsizliklə barışmayan Azərbaycan dövləti Şuşanın azad olunmasını strateji məqsəd kimi saxladı. Şuşanın azadlığı təkcə hərbi uğur deyil, həm də milli ləyaqətin bərpası idi. Hər bir azərbaycanlı üçün bu şəhərin azad edilməsi ədalətin bərpası və dövlətin gücünün sübutu idi.

Prezident İlham Əliyevin rəhbərliyi ilə həyata keçirilən 44 günlük Vətən müharibəsi zamanı Şuşa əməliyyatı ən həlledici mərhələ oldu. Şəhərin relyefi və coğrafi mövqeyi əməliyyatın çətinliyini artırırdı, lakin Azərbaycan əsgəri böyük iradə və peşəkarlıq nümayiş etdirdi. 8 noyabr 2020-ci ildə Şuşa azad olundu və Ali Baş Komandan bu tarixi xəbəri xalqa çatdırdı. Bu hadisə ilə müharibənin taleyi dəyişdi, Ermənistan tərəfi müqavimət göstərmək imkanını itirdi və qısa müddətdə kapitulyasiyaya məcbur oldu. Beləliklə, Şuşa əməliyyatı Azərbaycanın hərbi tarixində dönüş nöqtəsinə çevrildi.

Hazırda Şuşada genişmiqyaslı bərpa işləri aparılır. Yol və enerji infrastrukturu yenilənir, tarixi abidələr bərpa edilir, yeni sosial obyektlər tikilir. Şəhər həm turizm, həm də mədəni tədbirlər baxımından canlanma dövrünə qədəm qoyub. Burada keçirilən dövlət tədbirləri və beynəlxalq konfranslar Şuşanın həm mənəvi, həm də iqtisadi əhəmiyyətini artırır. Şuşanın dirçəlişi Prezident İlham Əliyevin rəhbərliyi ilə azad torpaqlarda həyata keçirilən yenidənqurma siyasətinin tərkib hissəsidir.

Səmayə Əliyeva

YAP Şuşa rayon təşkilatının fəal üzvü