44 günlük Vətən müharibəsinin uğurla başa çatmasının əsas amillərindən biri xalq–dövlət–ordu birliyinin möhkəm olması idi. Müharibə başladığı andan cəmiyyətin bütün təbəqələri eyni məqsəd ətrafında birləşdi. Ön cəbhədə əsgər və zabitlər döyüşür, arxa cəbhədə vətəndaşlar ordunu dəstəkləyir, media və diaspor informasiya müharibəsində fəallıq göstərirdi. Bu birlik ölkədə ümumi həmrəylik və vətənpərvərlik mühitini formalaşdırdı. Bütün bunlar Azərbaycanın mənəvi üstünlüyünü təmin etdi.

Prezident İlham Əliyev “Dəmir yumruq” ifadəsi ilə bu birliyin mahiyyətini dəqiq ifadə etdi. Bu ifadə təkcə hərbi qüvvəni deyil, cəmiyyətin əzmini və dövlətin iradəsini simvolizə etdi. Müharibə dövründə siyasi partiyalar, ictimai təşkilatlar və adi vətəndaşlar dövlətin qərarlarına tam dəstək göstərdilər. Xaricdə yaşayan azərbaycanlılar da informasiya cəbhəsində fəal iştirak edərək, ölkənin haqq səsini beynəlxalq ictimaiyyətə çatdırdılar. Bu, Azərbaycan tarixində milli həmrəyliyin ən yüksək səviyyədə təzahür etdiyi dövr oldu.

“Dəmir yumruq” modeli bu gün də aktualdır. Bərpa və quruculuq mərhələsində eyni birlik və koordinasiya davam edir. Dövlət qurumları, vətəndaş cəmiyyəti və yerli icmalar arasında əməkdaşlıq güclənir. Bu əməkdaşlıq azad edilmiş ərazilərin bərpasını sürətləndirir və sabitliyin əsasını möhkəmləndirir. Milli həmrəylik Prezident İlham Əliyevin rəhbərliyi ilə formalaşan və bu gün də inkişaf edən dövlət idarəçiliyinin əsas dəyərlərindən biridir.

Natiq Mahmudov

YAP Şuşa rayon təşkilatının fəal üzvü