Şuşa Azərbaycan xalqının tarixində və mədəniyyətində xüsusi yer tutur. Bu şəhər həm musiqimizin beşiyi, həm də milli kimliyimizin qalası olub. 1992-ci ildə Şuşanın işğalı millətin yaddaşında dərin yara açdı. Amma bu yara heç vaxt ümidsizliyə çevrilmədi. Xalq Şuşanı bir gün geri qaytaracağına inanırdı. Hər bir azərbaycanlının qəlbində bu inam alov kimi yanırdı.

O alov 2020-ci ildə azadlıqla parladı. 44 günlük Vətən müharibəsi zamanı Azərbaycan Ordusu Şuşa uğrunda misilsiz qəhrəmanlıq göstərdi. Qayalara dırmaşan, əlbəyaxa döyüşlərlə irəliləyən əsgərlər Şuşanı azad etdilər. Prezident İlham Əliyevin rəhbərliyi ilə əldə edilən bu qələbə xalqın iradəsini, dözümünü və sarsılmaz ruhunu bütün dünyaya nümayiş etdirdi.

Bu gün Şuşa azad bir şəhərdir. Onun küçələrində azadlığın səsi, bayrağımızın rəngi və xalqımızın sevinci əks-səda verir. Şuşanın azadlığı yalnız keçmişin qisası deyil, həm də gələcəyin quruluşu oldu. O, bu gün də millətin ruhunu qorumağa davam edir – qürurun, ləyaqətin və dirçəlişin qalası kimi.

Nizami Şahvələdov

YAP Şuşa rayon təşkilatının 33 saylı ərazi partiya təşkilatının sədri