Vətən müharibəsi Azərbaycanın müasir tarixində ən şərəfli dövr kimi yadda qaldı. 2020-ci ilin payızında başlanan 44 günlük savaş otuz illik ədalətsizliyə son qoydu və torpaqlarımızı işğaldan azad etdi. Bu müharibə millətin bir yumruq kimi birləşdiyi, dövlət iradəsinin qələbə qazandığı an idi.

Prezident İlham Əliyevin rəhbərliyi ilə Azərbaycan həm döyüş meydanında, həm də diplomatik cəbhədə parlaq nəticələr əldə etdi. Ordumuz yüksək peşəkarlıq, texnoloji üstünlük və mənəvi güc nümayiş etdirdi. Şuşa uğrunda döyüşlər isə bu qəhrəmanlığın zirvəsi oldu.

Şuşanın azadlığı düşməni kapitulyasiyaya məcbur etdi. 10 noyabr 2020-ci il tarixində imzalanan üçtərəfli bəyanatla müharibə başa çatdı. Azərbaycan təkcə ərazi bütövlüyünü deyil, həm də milli ləyaqətini bərpa etdi. Bu qələbə Cənubi Qafqazın geosiyasi reallıqlarını dəyişdi.

Zəfərdən sonra ölkəmiz yeni mərhələyə qədəm qoydu – quruculuq və dirçəliş dövrü. Qarabağda və Şərqi Zəngəzurda bərpa işləri aparılır, yeni hava limanları, ağıllı kəndlər tikilir, köçkünlər doğma yurdlarına qayıdır. Bu, qələbənin davamı və xalq iradəsinin göstəricisidir.

Bu gün Zəfər Günü həm qəhrəmanların ruhuna ehtiram, həm də gələcəyə baxış günüdür. Azərbaycan xalqı artıq müstəqil, güclü və qürurlu dövlət kimi regionda söz sahibidir.

Kamalə Səfərova

YAP Şuşa rayon təşkilatının 24 saylı ərazi partiya təşkilatının sədri