2020-ci ilin payızında başlanan 44 günlük Vətən müharibəsində “Dəmir yumruq” ifadəsi bir rəmzə çevrildi. Bu ifadə ordunun gücü ilə yanaşı, cəmiyyətin birliyini və dövlətin əzmini göstərirdi. Müharibə dövründə ön cəbhədə hərbçilər döyüşür, arxa cəbhədə xalq, dövlət qurumları, media və diaspor vahid məqsəd uğrunda fəaliyyət göstərirdi. Cəmiyyətin bütün təbəqələrinin bu birliyə dəstəyi qələbənin əsas dayağı oldu.

Siyasi partiyalar milli məsələdə vahid mövqe nümayiş etdirdilər. Fərqli baxışlara baxmayaraq, bütün əsas siyasi qüvvələr dövlətin və ordunun qərarlarını dəstəklədi. Bu həmrəylik uzun illərdən sonra siyasi mədəniyyətdə yeni mərhələ yaratdı. Xaricdə yaşayan azərbaycanlılar da informasiya müharibəsində fəal iştirak edərək, ölkəmizin haqq səsini dünyaya çatdırdılar. Media və sosial şəbəkələrdə dövlət mövqeyinin düzgün təqdimatı ictimai dəstəyin qorunmasında mühüm rol oynadı.

Ordu səviyyəsində bu birlik özünü nizam-intizamda, planlı əməliyyatlarda və yüksək mənəvi ruhda göstərdi. Əsgərlər və zabitlər arasında etimad, peşəkarlıq və Vətən sevgisi mühüm motivasiya amili idi. Dövlət tərəfindən təminat və koordinasiya düzgün qurulduğu üçün ordunun hərəkəti fasiləsiz davam etdi. Əməliyyatlar ardıcıl şəkildə uğurla nəticələndi.

“Dəmir yumruq” anlayışı müharibədən sonra da öz aktuallığını saxladı. Bu model bərpa və quruculuq dövründə də tətbiq olunur. Dövlət, xalq və cəmiyyətin birgə fəaliyyəti azad edilmiş ərazilərin yenidən dirçəlməsində əsas rol oynayır. Bu həmrəylik Azərbaycanın gələcək inkişafında mühüm sosial resursa çevrilib.

Elxan Ələkbərov

YAP Şuşa rayon təşkilatının fəal üzvü