Zəfərdən sonra Azərbaycan dövləti azad edilmiş ərazilərdə genişmiqyaslı bərpa proqramına başladı. İlk növbədə minalardan təmizləmə, yol, enerji və su infrastrukturunun bərpası həyata keçirildi. Məqsəd bu torpaqlarda təhlükəsiz və müasir yaşayış mühiti yaratmaqdır. Dövlət tərəfindən təsdiqlənən “Böyük Qayıdış” proqramı mərhələli şəkildə icra olunur. Artıq bir sıra yaşayış məntəqələri tamamilə yenidən qurulub və köçürülmə prosesi davam edir.

Prezident İlham Əliyevin rəhbərliyi ilə həyata keçirilən layihələr azad torpaqlarda davamlı inkişafı təmin edir. Füzuli, Zəngilan və Laçında beynəlxalq hava limanlarının istifadəyə verilməsi regionun iqtisadi və nəqliyyat potensialını artırıb. Yeni avtomobil və dəmir yolları Qarabağı ölkənin digər bölgələri ilə birləşdirir. Eyni zamanda, məktəblər, xəstəxanalar və sosial obyektlər tikilərək, sakinlər üçün bütün zəruri şərait yaradılır. Dövlətin məqsədi azad torpaqlarda müasir və dayanıqlı həyatın formalaşmasıdır.

“Böyük Qayıdış” təkcə infrastrukturun bərpası deyil, həm də sosial və iqtisadi sistemin yenidən qurulması deməkdir. Bu ərazilərdə sahibkarlıq, turizm və kənd təsərrüfatı sahələrinin inkişafı üçün geniş imkanlar yaradılır. Qaçqın və məcburi köçkünlərin doğma yurdlarına qayıtması Azərbaycan cəmiyyətində tarixi ədalətin bərpası kimi qəbul olunur. Bu proses ölkənin gələcəyi üçün həm sosial, həm də strateji baxımdan böyük əhəmiyyət daşıyır.

Aynurə Məlikova

YAP Şuşa rayon təşkilatının 25 saylı ərazi partiya təşkilatının sədri