Azərbaycan Milli Elmlər Akademiyasının 80 illik yubileyi ölkəmizin elmi və intellektual həyatında əlamətdar hadisədir. Bu tədbir təkcə elmi qurumun yubileyi deyil, həm də dövlətin elmə verdiyi dəyərin, milli düşüncənin və strateji inkişaf xəttinin təntənəsidir. Prezident İlham Əliyevin bu yığıncaqdakı çıxışı elmin dövlət siyasətində tutduğu mühüm yeri bir daha təsdiqlədi. Dövlət başçısı qeyd etdi ki, elmi tərəqqi yalnız laboratoriyalarda deyil, həm də idarəçilik, iqtisadiyyat və təhlükəsizlik sahələrində öz təsirini göstərir.

Akademiyanın 80 illik fəaliyyəti ərzində Azərbaycan elmi böyük inkişaf yolu keçib. Bu illər ərzində fundamental elmlərdən tutmuş tətbiqi tədqiqatlara qədər geniş sahələrdə nailiyyətlər əldə olunub. Elmin institusional inkişafı, elmi məktəblərin yaranması və gənc alimlərin yetişdirilməsi ölkənin intellektual potensialını formalaşdırıb. Bu nailiyyətlər sayəsində Azərbaycan elmi regionda mühüm mövqeyə sahib olub.

Ulu Öndər Heydər Əliyevin 1970-ci illərdə başlatdığı elmi siyasət bu uğurların təməlini qoyub. Həmin dövrdə elmi-tədqiqat institutlarının yaradılması, maddi-texniki bazanın möhkəmləndirilməsi və gənclərin elmə cəlbi sistemli şəkildə həyata keçirilib. Məhz bu siyasətin nəticəsində Azərbaycan alimləri beynəlxalq səviyyədə tanınmağa başlayıb və milli elmi məktəblər formalaşıb.

Bu gün Prezident İlham Əliyevin rəhbərliyi ilə həmin siyasət daha müasir məzmun qazanıb. Elmə ayrılan maliyyə resurslarının artırılması, elmi fondların yaradılması və rəqəmsallaşmanın tətbiqi elmi idarəetmənin keyfiyyətini yüksəldib. Elm artıq ölkənin müdafiə, iqtisadiyyat və texnologiya strategiyalarının ayrılmaz hissəsinə çevrilib. Bu, dövlətin intellektual gücünün real göstəricisidir.

YAP Şuşa rayon təşkilatının 10 saylı ərazi təşkilatının
Sədr müavini: Anar Xəlilov