8 Noyabr 2020-ci il Azərbaycan xalqının çoxəsrlik tarixində qızıl hərflərlə yazılmış ən şanlı günlərdən biridir. Bu tarix, torpaqlarımızın azadlığı uğrunda canından keçən qəhrəmanların, şəhidlərimizin və qazilərimizin əziz xatirəsinə əbədi hörmətin simvoludur. Otuz ilə yaxın davam edən işğal və məcburi köçkünlük dövrü, nəhayət, 44 günlük Vətən müharibəsində qazanılan möhtəşəm Qələbə ilə sona çatdı. Prezident, Müzəffər Ali Baş Komandan İlham Əliyevin rəhbərliyi altında Azərbaycan Ordusu öz qəhrəmanlığı, yüksək döyüş ruhu və milli birliyi sayəsində 30 illik ədalətsizliyə son qoydu. Bu, yalnız bir hərbi qələbə deyil, həm də xalqın mənəvi dirçəlişinin, milli ləyaqətin bərpasının təcəssümü idi.

Vətən müharibəsi 2020-ci il sentyabrın 27-də Ermənistanın növbəti genişmiqyaslı təxribatına cavab olaraq başladı. Azərbaycan öz beynəlxalq tanınmış sərhədləri daxilində ərazi bütövlüyünü bərpa etmək üçün haqq mübarizəsinə qalxdı. Müharibənin ilk günlərindən etibarən ordumuz cəbhənin bütün istiqamətlərində irəlilədi, düşmənin illərlə möhkəmləndirdiyi müdafiə xətləri darmadağın edildi. Müasir döyüş taktikası, yüksək texnologiyalar və ən əsası, əsgərlərimizin vətənpərvərliyi bu uğurun əsas səbəbləri idi. Hər bir qələbə xəbəri xalqın ruhunu daha da yüksəldir, bütün Azərbaycan “Dəmir Yumruq” kimi birləşərək ordusuna dəstək olurdu. Prezident İlham Əliyevin hər çıxışı xalqın inamını möhkəmləndirir, bu mübarizəni ədalətin təntənəsi kimi səciyyələndirirdi.

Bu müharibənin ən həlledici mərhələsi 8 Noyabrda Şuşanın azad edilməsi ilə tamamlandı. Azərbaycanın mədəniyyət beşiyi olan bu şəhər, həm strateji mövqeyinə, həm də mənəvi dəyərinə görə müharibənin taleyini müəyyənləşdirdi. Şuşa əməliyyatı hərb tarixində misilsiz qəhrəmanlıq nümunəsi kimi qəbul olunur — çünki Azərbaycan əsgəri qayalıqlar, sıldırımlar, sıx meşələr arasından keçərək düşmənin gözləmədiyi istiqamətlərdən şəhərə daxil olmuşdu. Ən az silah, amma ən çox imanla döyüşən bu qəhrəmanlar Şuşanı azad etməklə düşmənin “məğlubedilməzlik” mifini darmadağın etdilər. Şuşanın azadlığı Ermənistanı kapitulyasiyaya məcbur etdi və Ağdam, Kəlbəcər, Laçın rayonları döyüşsüz şəkildə Azərbaycana qaytarıldı.

8 Noyabr Zəfəri təkcə Azərbaycanın ərazi bütövlüyünün bərpası deyil, həm də milli kimliyimizin, birliyimizin və dövlətçiliyimizin möhkəmlənməsi deməkdir. Bu Qələbə xalqın, ordunun və rəhbərliyin sarsılmaz həmrəyliyinin nəticəsi oldu. Prezident İlham Əliyevin uzaqgörən siyasəti və diplomatik məharəti ilə Azərbaycan bu Zəfəri beynəlxalq miqyasda da siyasi reallığa çevirdi. Dünya Azərbaycanın gücünü, prinsipial mövqeyini və ədalət uğrunda mübarizə əzmini qəbul etdi. Bu gün Azərbaycan regionda sülhün, sabitliyin və inkişafın təminatçısı rolunu oynayır. Vətən müharibəsində şəhid olan qəhrəmanlarımızın qanı bahasına qazanılan bu Qələbə, gələcək nəsillər üçün əbədi iftixar mənbəyidir.

Bu gün Zəfər Günü hər il təntənə ilə qeyd olunur. Azad edilmiş torpaqlarda genişmiqyaslı bərpa, quruculuq və Böyük Qayıdış prosesi sürətlə davam edir. Şuşada, Füzulidə, Zəngilanda, Cəbrayılda və digər şəhərlərdə həyat yenidən canlanır. Azərbaycan xalqı qalib dövlətin vətəndaşları kimi bu Qələbəni qorumağa, onu gələcək nəsillərə çatdırmağa borcludur. Üçrəngli bayrağımız bu torpaqlarda əbədi dalğalanır, şəhidlərimizin ruhu qarşısında xalqımız baş əyir. 8 Noyabr Zəfər Günü – Azərbaycanın gücünün, xalqımızın birliyinin və sarsılmaz iradəsinin simvoludur. Biz bu torpaqlarda əbədi qalib xalq kimi yaşayacağıq!

Səbinə Gözəlova

YAP Şuşa Rayon Təşkilatının 41 saylı ərazi partiya təşkilatının sədri