44 günlük Vətən müharibəsinin ən parlaq səhifəsi 8 Noyabr 2020-ci ildə Şuşanın azad olunması oldu. Qarabağın tacı sayılan bu şəhər təkcə coğrafi məkan deyil, həm də Azərbaycan ruhunun beşiyidir. Şuşanın azad edilməsi ilə xalqımızın əsrlərlə çəkdiyi həsrət sona çatdı. Bu gün 8 Noyabr təkcə bir tarix deyil, millətin dirçəliş rəmzidir.

Prezident İlham Əliyevin rəhbərliyi ilə Azərbaycan Ordusu ən mürəkkəb dağ əməliyyatlarını uğurla həyata keçirdi. Şuşa uğrunda döyüşlər Azərbaycan əsgərinin iradəsinin, mərdliyinin və vətən sevgisinin zirvəsini göstərdi. Hər bir əsgərin qəlbində yanan Vətən eşqi bu tarixi qələbənin təməlini qoydu. Şuşada dalğalanan bayraq xalqımızın milli kimliyinin və azadlıq ruhunun simvoluna çevrildi.

Şuşanın azadlığı həm də mədəniyyətin, incəsənətin və mənəviyyatın dirçəlişi idi. Burada keçirilən “Xarıbülbül” festivalı, beynəlxalq tədbirlər və mədəni layihələr şəhərin əvvəlki şöhrətini geri qaytarır. Şuşa artıq yalnız tarixi şəhər deyil, həm də Azərbaycan mədəniyyətinin və dövlətçiliyinin paytaxtlarından biridir.

Qələbədən sonra dövlətimiz azad edilmiş ərazilərdə bərpa və yenidənqurma işlərinə geniş vüsət verib. Yeni yollar, hava limanları, “ağıllı kəndlər” inşa olunur. Bu layihələr həm iqtisadi, həm də sosial rifahın təminatçısıdır. Azərbaycanın məqsədi qalib ölkə olaraq regionda sabitlik və rifahın bərqərar edilməsidir.

8 Noyabr Zəfər Günü xalqın qəhrəmanlığının, birliyinin və sarsılmaz iradəsinin təntənəsidir. Şuşa bu zəfərin zirvəsi, qalib Azərbaycanın rəmzidir. Bu qələbə tarixdə əbədi qalacaq və gələcək nəsillərə vətənə sevginin, fədakarlığın və inamın ən ali nümunəsi kimi ötürüləcək.

Kamalə Səfərova

YAP Şuşa rayon təşkilatının 24 saylı ərazi partiya təşkilatının sədri