Azərbaycanın dövlətçilik tarixində 25 oktyabr 2020-ci il unudulmaz bir gündür. Həmin gün Qubadlı şəhəri və onun ətraf kəndləri işğaldan azad edildi. Bu, təkcə bir şəhərin xilası deyildi — bu hadisə Azərbaycanın suverenliyinin, xalqın iradəsinin və ədalətin bərpasının rəmzi idi. Qubadlının azad olunması Vətən müharibəsinin gedişatında mühüm mərhələ oldu və qələbəyə aparan yolun açılmasına səbəb verdi. Qubadlının strateji mövqeyi ordumuza Laçın və Şuşa istiqamətində irəliləmək üçün geniş imkanlar yaratdı.

Qubadlının azadlığına aparan yol Cəbrayıl və Zəngilan uğrunda aparılan uğurlu əməliyyatlardan keçirdi. Ordumuz dağlıq və mürəkkəb relyef şəraitində irəliləyərək düşmənin güclü istehkamlarını dağıtdı. 23 oktyabrda Alaqurşaq, Muğanlı, Kürd Mahruzlu və Zilanlı kəndləri, 25 oktyabrda isə Qubadlı şəhəri azad olundu. Prezident İlham Əliyev bu xəbəri xalqa çatdırarkən, “Qubadlının azad olunması bizim qələbəmizi yaxınlaşdırdı” sözləri ilə ordunun qəhrəmanlığını vurğuladı. Həmin an xalqımızın birliyi, ordu və dövlətin möhkəm tandemi tarixə yazıldı.

Qubadlının azad edilməsində iştirak edən on beş mindən çox hərbi qulluqçu “Qubadlının azad olunmasına görə” medalı ilə təltif edildi. Bu, dövlətin öz qəhrəman oğullarına olan yüksək etimadının təzahürüdür. Hər bir medal həm də şəhidlərimizin müqəddəs xatirəsinə ehtiram, xalqımızın qədirbilənliyinin rəmzidir. Qubadlı əməliyyatının uğurlu nəticələri sayəsində Azərbaycan Ordusu Şuşa istiqamətində irəliləyərək, müharibənin taleyini həll edən döyüşlərə başladı. Qubadlının azadlığı ilə düşmən artıq tam geri çəkilməyə məcbur oldu.

Bu gün Qubadlıda yeni həyat başlanır. Şəhər üçün təsdiq edilmiş 2040-cı ilədək Baş plana əsasən, burada yaşıl və ekoloji şəhər modeli qurulur. Təbiətə uyğun memarlıq, suya həssas şəhər yanaşması, kənd təsərrüfatı və aqroturizmin inkişafı prioritet istiqamətlərdəndir. Dövlət başçısı İlham Əliyevin dediyi kimi, “biz bu torpaqlarda əbədi yaşayacağıq”. Qubadlı azadlığın və yenidənqurmanın simvolu olaraq, Azərbaycanın gələcək nəsillərinə qürurla ötürüləcək bir dəyərə çevrilir.

Zərifə İbrahimova

YAP Şuşa rayon təşkilatının 25 saylı ərazi partiya təşkilatının sədr müavini