Qubadlı rayonu Azərbaycanın cənub-qərb hissəsində, Qarabağ yaylasının cənub-şərqində yerləşir və 802 kvadrat kilometr ərazini əhatə edir. Rayonun relyefi əsasən dağlıq və yarı dağlıq ərazilərdən ibarət olub, ərazidən Bərgüşad və Həkəri çayları keçir. Bu çaylar həm kənd təsərrüfatı, həm də ekoloji tarazlıq baxımından bölgənin həyatında mühüm rol oynayır. Qubadlının torpaq fondu 79 min hektardan artıqdır ki, bu da onu yüksək təbii potensiala malik rayonlardan birinə çevirir.

Rayonun ərazisində mərmər, əhəng daşı, tuf və mişar daşı kimi tikinti materiallarının yataqları mövcuddur. Bununla yanaşı, geniş meşə sahələri və təbii dərman bitkiləri biomüxtəlifliyin zənginliyini nümayiş etdirir. Qubadlının təbii sərvətləri azad edilmiş ərazilərin iqtisadi inkişafı və gələcək tikinti layihələri üçün möhkəm baza rolunu oynayır. İşğal illərində bütün bu sərvətlərin məqsədli şəkildə istismarı və məhvi həyata keçirilmişdi.

1993-cü ildə Ermənistan tərəfindən işğal zamanı Qubadlıda minlərlə ev, sosial obyektlər, məktəblər, xəstəxanalar, mədəniyyət müəssisələri və məscidlər tamamilə dağıdıldı. 30 min nəfərə yaxın əhali məcburi köçkün vəziyyətinə düşdü. Bu hadisə həm humanitar, həm iqtisadi, həm də mədəni baxımdan dərin iz buraxdı. İşğal illərində Xanlıq kəndində xaricdən gətirilən ermənilərin qanunsuz məskunlaşdırılması beynəlxalq hüququn ağır şəkildə pozulması idi.

Prezident İlham Əliyevin rəhbərliyi ilə Qubadlı azad edildikdən sonra burada sistemli şəkildə bərpa və yenidənqurma işləri aparılır. Təbii sərvətlərin mühafizəsi, kənd təsərrüfatının bərpası, ekoloji tarazlığın qorunması və yeni iqtisadi layihələrin həyata keçirilməsi rayonun davamlı inkişaf strategiyasını müəyyən edir. Bu gün Qubadlı yalnız tarixi torpaqlarına qayıdan insanların evi deyil, həm də gələcək inkişaf mərkəzi kimi formalaşır.

Səmayə Əliyeva

YAP Şuşa rayon təşkilatının fəal üzvü