25 oktyabr 2020-ci il Azərbaycan xalqının yaddaşında qürur, sevinc və tarixi ədalətin bərpası günü kimi yaşayır.Müzəffər Ali Baş Komandan İlham Əliyevin rəhbərliyi ilə həmin gün Qubadlı şəhəri 27 illik işğaldan azad edildi. Bu qələbə 44 günlük Vətən müharibəsində Azərbaycanın hərbi üstünlüyünün və xalqımızın sarsılmaz birliyinin daha bir parlaq təzahürü oldu. Bu an bütün Azərbaycan üçün milli iradənin və haqlı mübarizənin zəfəri idi.

Qubadlı rayonunun strateji mövqeyi uzun illər boyunca onun əhəmiyyətini artıran əsas amillərdən biri olub. Rayon həm Laçın dəhlizinə, həm də Ermənistanla sərhəd bölgələrinə yaxın yerləşir. Bu səbəbdən Qubadlının azad olunması düşmən ordusunun Ermənistandan Qarabağdakı hərbi birləşmələrinə uzanan təchizat xəttini zəiflətmiş, müharibənin sonrakı gedişinə ciddi təsir göstərmişdir. Azərbaycan Ordusunun döyüşçüləri çətin relyefə və gücləndirilmiş düşmən istehkamlarına baxmayaraq, böyük şücaət və qətiyyət nümayiş etdirdilər.

İşğal dövründə Qubadlıya vurulan ziyan təkcə maddi dağıntılarla məhdudlaşmırdı. Tarixi abidələr, qəbiristanlıqlar, dini məbədlər məhv edilmiş, yüzlərlə yaşayış məntəqəsi yerlə-yeksan olunmuşdu. Qubadlı sakinləri isə illərlə həsrət içində doğma yurdlarının azad olunacağı günü gözləyirdilər. Bu illər ərzində xalqımızın yaddaşında Qubadlı müqavimətin, dözümlülüyün və milli həsrətin rəmzlərindən birinə çevrilmişdi.

Qələbədən sonra dövlətimiz tərəfindən Qubadlının bərpası istiqamətində genişmiqyaslı işlərə start verildi. Yeni yollar, enerji şəbəkələri, sosial obyektlər və yaşayış məhəllələri inşa olunur. Mahruzlu və Zilanlı kəndlərinin müasir standartlarla yenidən salınması Böyük Qayıdış Proqramının real icrasının nümunəsidir. Bu gün Qubadlı torpaqlarına həyat qayıdır, uzun illərin sükutu bərpa və quruculuq sədası ilə əvəz olunub.

25 oktyabrın Qubadlı şəhəri günü kimi təsdiq edilməsi isə bu tarixi qələbənin həmişəlik yaddaşlarda yaşayacağını göstərir. Hər il bu tarix böyük fəxr və ehtiramla qeyd edilir. Şəhidlərin ruhu yad olunur, qazilərə hörmət göstərilir, Qubadlının yenidən doğuluşu isə xalqın gələcəyə olan inamını gücləndirir. Qubadlı bu gün həm qəhrəmanlıq tariximizin, həm də bərpa və inkişaf mərhələmizin rəmzidir.

Əminə Məhərrəmova

YAP Şuşa rayon təşkilatının 32 saylı ərazi partiya təşkilatının sədri