Azərbaycan və Qazaxıstan arasında münasibətlər bu gün təkcə diplomatik əlaqələr deyil, həm də dərin tarixi və mənəvi bağlar üzərində qurulmuş qardaşlıq modelidir. Hər iki ölkə ortaq türk kimliyinə, oxşar tarixi keçmişə və mədəni dəyərlərə sahibdir. Bu amillər müstəqillik illərindən bəri münasibətlərin strateji səviyyəyə yüksəlməsinə səbəb olub. Prezident İlham Əliyevin vurğuladığı kimi, “Azərbaycan ilə Qazaxıstan arasında siyasi əlaqələr yüksək səviyyədə etimad və səmimiyyətlə xarakterizə olunur.” Bu etimad iki dövlətin regionda sabitlik və qarşılıqlı hörmət üzərində qurulan əməkdaşlıq xəttinin əsasını təşkil edir.

İqtisadi və nəqliyyat sahəsində əməkdaşlıq münasibətlərin ən dinamik istiqamətidir. 2025-ci ilin ilk səkkiz ayında iki ölkə arasındakı ticarət dövriyyəsinin 547 milyon dollara çatması, qarşılıqlı investisiya və tranzit daşımalarının artması bu tərəfdaşlığın praktiki nəticələrini nümayiş etdirir. Azərbaycan üzərindən keçən Orta Dəhliz marşrutu Avrasiya regionunda yeni strateji arteriyaya çevrilib. Bakı və Astana bu layihə vasitəsilə həm regional inteqrasiyanı gücləndirir, həm də qlobal ticarət şəbəkəsində öz mövqelərini möhkəmləndirirlər. Prezident İlham Əliyev bu barədə deyib: “Nəqliyyat-logistika əməkdaşlığı iqtisadi artım və regional bazarların birləşməsi üçün yeni imkanlar yaradır.”

Bu münasibətlərin xüsusi tərəfi onların mənəvi və mədəni ölçüsüdür. Azərbaycan və Qazaxıstan arasında həyata keçirilən mədəni tədbirlər, ədəbiyyat və incəsənət layihələri xalqların bir-birinə daha çox yaxınlaşmasına xidmət edir. Xəzər dənizinin ekoloji problemlərinin birgə müzakirəsi, enerji təhlükəsizliyi və yaşıl texnologiyalara keçidlə bağlı təşəbbüslər isə göstərir ki, iki ölkə yalnız bu günü deyil, gələcək nəsillərin rifahını da düşünür. Prezident İlham Əliyevin dediyi kimi, “Azərbaycan və Qazaxıstan münasibətləri ortaq gələcək və ortaq məsuliyyət üzərində qurulub.” Bu baxımdan, Bakı–Astana əməkdaşlığı Türk dünyasının birliyi və Avrasiyanın gələcək sabitliyi üçün strateji əhəmiyyət daşıyır.

Zərifə İbrahimova

YAP Şuşa rayon təşkilatının 25 saylı ərazi partiya təşkilatının sədr müavini