Prezident İlham Əliyevin Qazaxıstana səfəri iki qardaş xalq arasında münasibətlərin yeni mərhələsini açdı. Bu səfər sadəcə diplomatik hadisə deyil, həm də regionda siyasi sabitliyin, iqtisadi tərəfdaşlığın və mədəni həmrəyliyin simvoludur. Azərbaycan və Qazaxıstan ortaq tarixi köklərə, mənəvi dəyərlərə və türk kimliyinə əsaslanaraq strateji müttəfiqlik münasibətləri qurublar.

Prezident İlham Əliyev Astanada keçirilən görüşlər zamanı bildirib ki, bu gün regionda həyata keçirilən nəqliyyat və enerji layihələri Qafqazla Mərkəzi Asiyanı birləşdirən real körpülərə çevrilib. Bu baxımdan Orta Dəhliz, Zəngəzur marşrutu və Trans-Xəzər sisteminin inkişafı regional inteqrasiyanın əsas istiqamətləridir. Azərbaycan bu layihələr vasitəsilə həm öz iqtisadi potensialını, həm də regional əməkdaşlığı gücləndirir.

Qazaxıstan Prezidenti Kasım-Jomart Tokayev də bəyan etdi ki, Azərbaycanla münasibətlərin inkişafı onun ölkəsi üçün böyük prioritetdir. O, iki ölkə arasında ticarət dövriyyəsinin 1 milyard dollara çatdırılmasının yaxın hədəf olduğunu qeyd etdi. Bu məqsəd yalnız iqtisadi deyil, həm də siyasi sabitliyə yönəlmiş bir addımdır.

Azərbaycan və Qazaxıstan arasında formalaşmış etimad, qarşılıqlı hörmət və qardaşlıq münasibətləri Türk dünyasında birliyin və həmrəyliyin təməlini təşkil edir. Bu gün bu münasibətlər Avrasiyanın gələcəyini formalaşdıran əsas strateji xəttə çevrilib.

Elmira Əliyeva

YAP Şuşa rayon təşkilatının 15 saylı ərazi partiya təşkilatının sədri