Azərbaycan və Qazaxıstan arasında formalaşan münasibətlər bu gün təkcə coğrafi yaxınlıq və ortaq tarixi bağlarla deyil, həm də dərin siyasi, iqtisadi və mədəni inteqrasiya meyilləri ilə xarakterizə olunur. Hər iki ölkə müstəqillik əldə etdikdən sonra qarşılıqlı etimada əsaslanan, bərabərhüquqlu əməkdaşlıq prinsipləri üzərində möhkəm təməl qurmuşdur. Prezident İlham Əliyevin 2025-ci il oktyabrın 18-də “Kazinform” agentliyinə verdiyi müsahibə bu istiqamətdə yürüdülən strateji xəttin bariz göstəricisidir. Dövlət başçısının səsləndirdiyi fikirlər Azərbaycanın Qazaxıstanla münasibətlərə strateji yanaşmasını, türk dünyasında həmrəyliyin möhkəmlənməsinə verdiyi önəmi bir daha təsdiqlədi.

Bu münasibətlərin əsasını ortaq mədəni köklər, dil, din və mənəvi dəyərlər təşkil edir. İki xalq arasındakı qardaşlıq münasibətləri dövlətlərarası səviyyədə səmərəli əməkdaşlığa çevrilərək həm ikitərəfli, həm də çoxtərəfli formatlarda uğurla inkişaf edir. Xüsusilə Türk Dövlətləri Təşkilatı və digər beynəlxalq platformalar çərçivəsində birgə təşəbbüslər türk dünyasının siyasi, iqtisadi və humanitar birliyinin möhkəmlənməsinə xidmət edir. Azərbaycan və Qazaxıstan liderləri arasında mütəmadi görüşlər, qarşılıqlı səfərlər və imzalanan sənədlər bu tərəfdaşlığın sistemli xarakter daşıdığını göstərir.

Enerji, nəqliyyat və logistika sahələrində əməkdaşlıq iki ölkənin münasibətlərinin əsas dayaqlarından biridir. “Orta Dəhliz” layihəsi bu baxımdan strateji əhəmiyyət kəsb edir. Xəzər regionunda yerləşən hər iki dövlət bu dəhlizin inkişafında əsas rol oynayaraq Avrasiya məkanında yeni iqtisadi və ticarət marşrutlarının formalaşmasına töhfə verir. Prezident İlham Əliyevin vurğuladığı kimi, bu layihə təkcə iqtisadi maraqlara deyil, həm də regional sabitlik və təhlükəsizliyə xidmət edir.

Azərbaycan-Qazaxıstan əlaqələrinin mənəvi ölçüsü də xüsusi diqqətəlayiqdir. Qazaxıstanın işğaldan azad edilmiş ərazilərin bərpasına verdiyi dəstək, xüsusilə Füzuli rayonunda inşa edilən “Qazaxıstan-Azərbaycan Dostluq Məktəbi” layihəsi bu qardaşlığın canlı rəmzidir. Bu təşəbbüs gələcək nəsillər üçün dostluq və həmrəylik nümunəsi olmaqla yanaşı, iki xalq arasında sarsılmaz mədəni körpülərin möhkəmlənməsini təmin edir. Beləliklə, Azərbaycan-Qazaxıstan münasibətləri regionda sabitliyin, inkişafın və türk birliyinin dayaqlarından biri kimi strateji əhəmiyyətini getdikcə artırır.

Əminə Məhərrəmova

YAP Şuşa rayon təşkilatının 32 saylı ərazi partiya təşkilatının sədri