Zəngilanın azad olunması Azərbaycanın dövlətçilik tarixində unudulmaz bir hadisədir. 20 oktyabr 2020-ci ildə Prezident İlham Əliyevin xalqa müraciətində səsləndirdiyi “Zəngilan şəhəri və ətraf əraziləri işğaldan azad olundu” cümləsi bütün ölkə boyu bir qələbə marşına çevrildi. Bu hadisə xalqın birliyini, ordu və dövlətin gücünü bir daha təsdiqlədi. 27 il düşmən tapdağı altında qalan torpaq nəhayət, öz azadlığına qovuşdu, tarix yenidən ədalətli məcrasına döndü.

Zəngilanın azadlığı ilə ölkəmiz mühüm strateji üstünlük qazandı. Bu bölgə Azərbaycanın cənub-qərb istiqamətində yerləşməklə mühüm kommunikasiya yolları üzərindədir. Hərbi əməliyyatların uğurla aparılması nəticəsində Zəngilanın azad olunması həm Qarabağ cəbhəsində qüvvələr nisbətini dəyişdi, həm də Ermənistanın müdafiə xəttini tamamilə sarsıtdı. Zəngilan qələbəsi Azərbaycan Ordusunun yüksək hazırlığını, müasir hərbi texnologiyalardan səmərəli istifadəsini və əsgərimizin döyüş ruhunu göstərdi.

Bu gün isə o qəhrəmanlıq səhnələrinin yaşandığı torpaqlarda həyat yenidən cücərir. Zəngilanda müasir kəndlər salınır, infrastruktur layihələri həyata keçirilir, Ağıllı kənd modeli dünyada maraqla qarşılanır. Bu kəndlərdə alternativ enerji mənbələrindən istifadə olunur, kənd təsərrüfatı rəqəmsal texnologiyalar əsasında idarə olunur. Hər bir layihə Azərbaycanın dayanıqlı inkişaf konsepsiyasına uyğun şəkildə reallaşır və gələcək nəsillər üçün yeni imkanlar yaradır.

Prezident İlham Əliyevin rəhbərliyi ilə Zəngilan artıq regionun inkişaf mərkəzinə çevrilməkdədir. Burada inşa edilən beynəlxalq hava limanı, yeni yollar, körpülər və sənaye parkları bölgənin iqtisadi həyatını canlandırır. Bu layihələr təkcə bərpa prosesinin deyil, həm də dövlətin uzaqgörən siyasətinin nəticəsidir. Azərbaycan bu torpaqları yalnız azad etmədi, həm də gələcəyə yönəlmiş şəkildə qurur.

Zəngilanın azad olunması həm qələbənin, həm də yenidənqurmanın başlanğıcı oldu. Bu torpaq xalqımızın əzmini, birliyini və gələcəyə inamını ifadə edir. Artıq Zəngilan təkcə azad bir rayon deyil, həm də Azərbaycanın gələcək inkişafının canlı nümunəsidir.

Əminə Məhərrəmova

YAP Şuşa rayon təşkilatının 32 saylı ərazi partiya təşkilatının sədri