Zəngilanın işğaldan azad olunmasının beşinci ili tamam olur. 2020-ci il oktyabrın 20-si Azərbaycan tarixində qızıl hərflərlə yazılmış günlərdən biridir. Uzun illər düşmən tapdağı altında qalan bu torpaq, 44 günlük Vətən müharibəsinin ən qürurlu nəticələrindən biri kimi xalqımıza qaytarıldı. Azərbaycan Ordusunun peşəkarlığı, cəsarəti və Ali Baş Komandan İlham Əliyevin uzaqgörən rəhbərliyi ilə Zəngilan şəhəri azad olundu. Bu hadisə bir tərəfdən torpaq bütövlüyümüzün bərpası, digər tərəfdən xalqımızın mənəvi dirçəlişi kimi dəyərləndirilir.

Zəngilanın işğaldan azad edilməsi həm də Azərbaycan ordusunun texnoloji üstünlüyünün təntənəsi idi. Müasir pilotsuz uçuş aparatları vasitəsilə düşmənin dərinliklərindəki artilleriya qurğuları məhv edildi, texnikası sıradan çıxarıldı. Əməliyyatlar yüksək səviyyədə planlaşdırılaraq, komanda məntəqələrində dəqiq təhlil edilib. Kiçik çevik qrupların gecə sızma əməliyyatları düşmənə sarsıdıcı zərbələr endirdi və erməni qüvvələrini qaçmağa məcbur etdi. Bu, Azərbaycan hərb tarixində taktiki ustalığın və milli ruhun vəhdətini göstərən nümunələrdən biri kimi yadda qaldı.

Müharibədən sonra Zəngilan dərhal bərpa və yenidənqurma mərhələsinə qədəm qoydu. Qısa zamanda burada beynəlxalq hava limanı tikildi, avtomobil yolları salındı, kəndlər bərpa olundu. Xüsusilə “ağıllı kənd” layihəsi çərçivəsində Ağalı kəndinin yenidən qurulması ölkəmizin texnoloji və ekoloji düşüncəsinin bariz nümunəsidir. 2022-ci ildə bu kəndə ilk sakinlərin köçürülməsi Böyük Qayıdış prosesinin başlanğıcı oldu. Artıq məktəblər fəaliyyət göstərir, sosial obyektlər tikilir, həyat öz axarına qayıdır.

Bu gün Zəngilan təkcə yenidən doğulan bir rayon deyil, həm də Zəngəzur dəhlizinə açılan qapıdır. Coğrafi mövqeyinə görə strateji əhəmiyyət daşıyan bu ərazi regionun nəqliyyat xəritəsini dəyişir. Prezident İlham Əliyevin sözləri ilə desək, “Zəngəzur dəhlizi türk dünyasının birliyinə, iqtisadi əlaqələrin möhkəmlənməsinə xidmət edəcək.” Beləliklə, Zəngilan həm Azərbaycanı, həm də bütöv türk coğrafiyasını birləşdirən mənəvi və iqtisadi körpü rolunu oynayır.

Bu gün Zəngilanda dalğalanan üçrəngli bayraq Vətən müharibəsinin rəmzidir. Hər tikilən bina, hər inşa edilən məktəb, hər əkilən ağac xalqın dirçəlişinə, dövlətin gücünə işarədir. Zəngilan artıq Azərbaycanın gələcək simasının parlaq təcəssümüdür – yaşıl enerji, ağıllı idarəetmə və dayanıqlı inkişafın məkanı. Bu torpaq üzərində həyat yenidən canlanır və xalqımızın birliyi sayəsində Zəngilan sabahın şəhərinə çevrilir.

Könül Hüseynova

YAP Şuşa rayon təşkilatının 20 saylı ərazi partiya təşkilatının sədri