2020-ci ilin 20 oktyabrı Azərbaycan tarixinin unudulmaz günlərindəndir. Həmin gün Prezident İlham Əliyev xalqımıza müjdəli xəbər verdi: Zəngilan azad olundu! Bu xəbər hər bir azərbaycanlının qəlbində sevinc, fəxr və minnətdarlıq hissi oyatdı. 27 illik həsrət sona çatdı, Zəngilan yenidən öz doğma sahiblərinə qovuşdu.

Zəngilanın azadlığı həm hərbi, həm də mənəvi cəhətdən mühüm hadisə idi. Bu diyar illərlə işğalın ağrısını yaşasa da, xalqımız inamını itirmədi. 44 günlük müharibə ərzində Zəngilan uğrunda gedən döyüşlər ordumuzun qəhrəmanlığının parlaq nümunəsi oldu. Azərbaycan əsgəri bu torpaqlarda tarix yazdı, düşmən ordusunu darmadağın etdi.

İndi isə o torpaqlarda həyat yenidən doğulur. Ağıllı kənd layihələri, müasir infrastruktur, yollar və hava limanı bu bölgəni Azərbaycanın inkişaf simvollarından birinə çevirir. Zəngilan artıq təkcə azad olunmuş rayon deyil, həm də gələcəyin parlaq ümidlərindən biridir.

Prezident İlham Əliyevin uzaqgörən siyasəti sayəsində Zəngilan regionun iqtisadi və sosial inkişafında mühüm rol oynayacaq. Bu torpaqlarda qurulan hər bina, çəkilən hər yol xalqımızın əzmini və yenidənqurma iradəsini göstərir. Zəngilan Azərbaycanın gücünü dünyaya nümayiş etdirən canlı nümunəyə çevrilib.

Zəngilanın azad olunması yalnız bir rayonun deyil, bütövlükdə xalqın ruhunun azadlığı idi. Bu gün orada dalğalanan üçrəngli bayraq Azərbaycan xalqının qürurunun, birliyinin və əbədi müstəqilliyinin rəmzidir.

Nizami Şahvələdov

YAP Şuşa rayon təşkilatının 33 saylı ərazi partiya təşkilatının sədri