Füzuli Azərbaycanın ən qədim yaşayış məntəqələrindən biri kimi zəngin tarixə malikdir. Ərazisi Qarabağ dağ silsiləsinin ətəklərindən başlayaraq Araz çayına qədər uzanır və həm strateji, həm də iqtisadi baxımdan mühüm mövqeyə sahibdir. Quruçay, Köndələnçay və Çərəkən çayları bu torpaqlara həyat verir, onu kənd təsərrüfatı üçün əlverişli məkana çevirir. XIII–XIV əsrlərə aid Şeyx Babi Yaqub, Mirəli və Cəlil türbələri bu ərazinin zəngin mədəni keçmişini nümayiş etdirir.

1993-cü ildə Ermənistanın silahlı təcavüzü nəticəsində Füzuli rayonu işğal olundu. Onlarla kənd yerlə-yeksan edildi, əhali doğma yurdlarını tərk etməyə məcbur oldu. Lakin xalqımızın yaddaşından bu torpaq silinmədi. Füzuli azadlıq, səbir və qürurun rəmzinə çevrildi.

2020-ci ildə başlanan Vətən müharibəsi zamanı Azərbaycan Ordusu böyük qəhrəmanlıq göstərərək oktyabrın 17-də Füzulini azad etdi. Bu hadisə ölkə tarixinin dönüş nöqtəsi oldu. Füzulinin azad edilməsi Şuşa istiqamətində irəliləyişi təmin etdi və müharibənin nəticəsini müəyyənləşdirdi.

Azadlıqdan dərhal sonra genişmiqyaslı quruculuq işlərinə start verildi. Füzuli Beynəlxalq Hava Limanı, Zəfər yolu, yeni məktəblər, xəstəxanalar və sosial obyektlər bölgəyə həyat gətirdi. “Ağıllı şəhər” konsepsiyası çərçivəsində burada ekoloji və enerjiyə qənaətli sistemlər qurulur.

Bu gün Füzuli təkcə bir şəhər deyil, həm də Azərbaycanın gələcək vizyonunun parlaq nümunəsidir. Burada qurulan hər bir tikili, çəkilən hər bir yol dövlətin və xalqın azadlıqdan doğan iradəsini əks etdirir.

Natiq Mahmudov

YAP Şuşa rayon təşkilatının fəalı