Oktyabrın 10-da Düşənbədə keçirilən MDB Dövlət Başçıları Şurasının iclası Azərbaycan–Tacikistan münasibətlərində yeni mərhələnin əsasını qoydu. Prezident İlham Əliyevin Tacikistanla bağlı çıxışı iki ölkə arasında formalaşan dostluq və qarşılıqlı etimad mühitini əks etdirdi. Dövlət başçısı Tacikistan Prezidenti Emoməli Rəhmonun ev sahibliyinə və qardaşlıq münasibətinə görə təşəkkürünü bildirərək, bu əlaqələrin regionda sabitlik və əməkdaşlığın təmininə böyük töhfə verdiyini vurğuladı.

İki ölkə arasında münasibətlərin əsası hələ 1990-cı illərin əvvəllərində Ümummilli Lider Heydər Əliyev və Emoməli Rəhmon tərəfindən qoyulub. O dövrdən bəri bu dostluq xətti strateji tərəfdaşlığa çevrilib. Prezident İlham Əliyev də çıxışında qeyd etdi ki, Azərbaycan və Tacikistan qarşılıqlı dəstəyə, bərabərhüquqlu əməkdaşlığa və ortaq maraqlara əsaslanan münasibətləri inkişaf etdirir.

Düşənbə sammitində səslənən fikirlər göstərdi ki, Azərbaycan–Tacikistan əməkdaşlığı yalnız siyasi deyil, həm də iqtisadi və humanitar sferalarda genişlənir. İki ölkə arasında ticarət, nəqliyyat, enerji və mədəniyyət sahələrində həyata keçirilən layihələr regional tərəfdaşlığın dərinləşməsinə xidmət edir.

Prezident İlham Əliyev həmçinin MDB çərçivəsində humanitar əlaqələrin gücləndirilməsinin, gənclər və mədəniyyət sahəsində ortaq təşəbbüslərin reallaşdırılmasının vacibliyini qeyd etdi. Bu baxımdan, Gəncədə keçirilən III MDB Oyunlarının xalqlar arasında dostluq və qarşılıqlı anlayışı artırdığı vurğulandı.

Azərbaycan və Tacikistan münasibətləri bu gün qarşılıqlı etimad, qarşılıqlı maraqlar və dostluq üzərində formalaşan dayanıqlı əməkdaşlıq modelidir. Düşənbə iclası bu münasibətlərin gələcək inkişafı üçün strateji yol xəritəsinin əsasını qoydu.

Anar Cəbizadə

YAP Şuşa rayon təşkilatının 37 saylı ərazi partiya təşkilatının sədr