2025-ci il sentyabrın 30-da İtaliya Prezidenti Sercio Mattarellanın Bakıya rəsmi səfəri ölkələrimiz arasında münasibətlərin yeni bir mərhələyə qədəm qoyduğunu göstərdi. Bu səfər çərçivəsində keçirilən görüşlərdə və imzalanan sənədlərdə iki ölkənin siyasi, iqtisadi və humanitar sahələrdə dərinləşən əməkdaşlığı aydın görünürdü. Prezident İlham Əliyev çıxışında Mattarellanın Azərbaycana ikinci dəfə dövlət səfəri etməsini dostluq münasibətlərinin səmimiyyətini nümayiş etdirən mühüm fakt kimi vurğuladı.

Azərbaycan–İtaliya əlaqələrinin təməli hələ 1990-cı illərin əvvəllərində qoyulub. İtaliya Azərbaycanın müstəqilliyini tanıyan ilk Avropa dövlətlərindən biri olub. Sonrakı dövrdə imzalanan sazişlər, xüsusilə 2015-ci il və 2020-ci il strateji tərəfdaşlıq sənədləri münasibətlərin hüquqi dayaqlarını gücləndirdi. Bu gün hər iki ölkənin rəhbərlərinin tez-tez görüşməsi, siyasi dialoqun ən yüksək səviyyəyə çatdığını təsdiqləyir.

Energetika sahəsi münasibətlərin aparıcı istiqaməti olaraq qalır. Azərbaycan nefti İtaliyanın enerji balansında birinci, qazı isə ikinci yerdədir. Cənub Qaz Dəhlizinin ən mühüm seqmentlərindən biri olan TAP layihəsi tərəflərin ortaq səylərinin bariz nəticəsidir. Bu layihə həm Azərbaycanın Avropada enerji təminatçısı kimi mövqeyini gücləndirib, həm də İtaliyanın enerji təhlükəsizliyini möhkəmləndirib.

İqtisadi sahədə də əlaqələr yüksələn xətlə inkişaf edir. İtaliya Azərbaycanın əsas ticarət tərəfdaşıdır, Cənubi Qafqaz ölkələri ilə aparılan ticarətin 95 faizi məhz Azərbaycanın payına düşür. İtaliya şirkətlərinin sənaye və infrastruktur layihələrində iştirakı, həmçinin Azərbaycan məhsullarının İtaliya bazarına çıxışı ikitərəfli əməkdaşlığın konkret nəticələridir.

Humanitar əməkdaşlıq da diqqət çəkir. İtaliya–Azərbaycan Universitetinin açılışı, azərbaycanlı tələbələrin İtaliyada təhsil imkanlarının genişlənməsi, Heydər Əliyev Fondunun Romada və Vatikanda həyata keçirdiyi mədəni layihələr xalqlarımızın yaxınlaşmasına xidmət edir. Bu səbəbdən Prezident İlham Əliyevin də qeyd etdiyi kimi, Azərbaycan–İtaliya münasibətləri yalnız rəsmi sənədlərdə deyil, real həyatda və konkret layihələrdə özünü göstərən sarsılmaz tərəfdaşlıq nümunəsidir.

Leyla Babışova

YAP Şuşa rayon təşkilatının sədr müavini