Prezident İlham Əliyevin BMT Baş Assambleyasındakı çıxışında diqqət çəkən məqamlardan biri Qarabağda separatizmin tamamilə aradan qaldırılması oldu. Dövlət başçısı bəyan etdi ki, artıq regionda separatizmə yer yoxdur və bu, yeni siyasi reallığın əsasını təşkil edir. Bu açıqlama beynəlxalq miqyasda böyük rezonans doğurdu.

Qarabağ münaqişəsinin 30 ildən artıq davam etməsi regionda sabitliyə ciddi maneə idi. Ermənistanın işğalçı siyasəti və separatçı rejimin himayəsi bölgədə gərginliyi dərinləşdirirdi. Lakin Azərbaycan Vətən müharibəsi və sonrakı antiterror əməliyyatları ilə bu problemin tamamilə həllinə nail oldu.Yeni reallıq region ölkələri üçün geniş imkanlar açır. Azərbaycan rəhbərliyi açıq şəkildə bildirib ki, bölgədə sabitlik və əməkdaşlıq üçün unikal şərait yaranıb. Bu, həm siyasi, həm iqtisadi, həm də humanitar sahələrdə yeni əməkdaşlıq platformalarının qurulmasına yol açır.

Separatizmin sona çatması Azərbaycanın beynəlxalq hüquqa sadiqliyini bir daha nümayiş etdirdi. Azərbaycan münaqişəni hərbi və siyasi yollarla, beynəlxalq hüquqa tam uyğun şəkildə həll etdi. Bu, digər münaqişə bölgələri üçün də nümunə ola biləcək unikal təcrübədir.Beynəlxalq ictimaiyyət də bu reallığı qəbul etməkdədir. Azərbaycan rəhbərliyinin ardıcıl çağırışları göstərir ki, sülh yalnız ədalət və beynəlxalq hüququn üstünlüyü əsasında mümkündür. Qarabağda separatizmin sona çatması bu prinsiplərin qələbəsi kimi qiymətləndirilir.

Nəticə olaraq, Qarabağ münaqişəsinin yekunlaşması regionda yeni siyasi mərhələnin başlanğıcıdır. Azərbaycan artıq yalnız qalib dövlət deyil, həm də sabitlik və əməkdaşlıq məkanı kimi qəbul edilir.

YAP Şuşa rayon təşkilatının 20 saylı ərazi partiya təşkilatının sədri :

Könül Hüseynova