Azərbaycanın BMT Baş Assambleyasında çıxışı ölkəmizin son illərdə əldə etdiyi tarixi Qələbə fonunda daha da böyük əhəmiyyət daşıyır. Prezident İlham Əliyev tribuna arxasından vurğuladı ki, artıq Qarabağ münaqişəsi birdəfəlik tarixə qovuşub və regionda yeni siyasi reallıqlar formalaşıb. Bu, təkcə Azərbaycanın deyil, bütün Cənubi Qafqazın gələcəyi üçün yeni imkanlar yaradır.

Prezident çıxışında xatırlatdı ki, 44 günlük Vətən müharibəsi nəticəsində Azərbaycanın ərazi bütövlüyü bərpa olundu və BMT Təhlükəsizlik Şurasının uzun illər kağız üzərində qalmış qətnamələri faktiki icra edildi. Bu hadisə həm tarixi ədalətin bərpası, həm də beynəlxalq hüququn üstünlüyünün təsdiqi oldu. Bu gün Azərbaycan artıq qalib dövlət kimi regionda sülhün qurucusu rolunda çıxış edir.

Yeni reallıqların əsas göstəricilərindən biri də separatizmin tamamilə aradan qaldırılmasıdır. Prezident İlham Əliyev bunu xüsusi vurğulayaraq bildirdi ki, regionda artıq qanunsuz hərbi birləşmələr yoxdur və sülh üçün unikal şərait formalaşıb. Bu, beynəlxalq ictimaiyyətin diqqətinə çatdırılan ən mühüm mesajlardan biri idi.

Eyni zamanda, Prezident Ermənistanla münasibətlərin normallaşdırılması istiqamətində atılan addımlardan danışdı. Azərbaycanın irəli sürdüyü beş əsas prinsip sülh prosesinin əsasında dayanır. Bu prinsiplər beynəlxalq hüquqa söykənir və bölgədə uzunmüddətli sabitliyin təmin olunmasına xidmət edir.

Regionda yaranan yeni siyasi mühit həm də iqtisadi əməkdaşlıq üçün yeni fürsətlər açır. Xüsusilə nəqliyyat dəhlizlərinin bərpası, yeni infrastruktur layihələri Cənubi Qafqazı qlobal bağlantı mərkəzinə çevirə bilər. Prezidentin çıxışında bu amillərə də xüsusi yer ayrıldı.

Beləliklə, Qarabağ zəfəri Azərbaycanın beynəlxalq arenada mövqeyini daha da gücləndirdi. Prezident İlham Əliyevin çıxışı göstərdi ki, bu Qələbə təkcə hərbi sahədə deyil, həm də diplomatik, siyasi və iqtisadi istiqamətlərdə yeni dövrün başlanğıcıdır.

Aynurə Məlikova

YAP Şuşa rayon təşkilatının 25 saylı ərazi partiya təşkilatının sədri