Azərbaycanın xarici siyasəti hər zaman balanslaşdırılmış və çoxşaxəli yanaşmaya əsaslanıb. Prezident İlham Əliyev BMT Baş Assambleyasındakı çıxışında da qeyd etdi ki, ölkəmiz beynəlxalq hüquqa əsaslanan, dövlətlərin daxili işlərinə qarışmayan, qarşılıqlı hörmət və əməkdaşlığa əsaslanan siyasət yürüdür. Bu yanaşma Azərbaycanın qlobal arenada etibarlı tərəfdaş kimi qəbul olunmasına səbəb olub.

Azərbaycan eyni zamanda həm ikitərəfli, həm də çoxtərəfli əməkdaşlıq formatlarında fəal iştirak edir. BMT ilə əməkdaşlıq bu istiqamətdə xüsusi yer tutur. 1992-ci ildən üzv olan ölkəmiz, təşkilatın əsas prinsiplərinə sadiqliyini bütün fəaliyyətində nümayiş etdirib.

Dövlətimizin başçısının çıxışında ABŞ, Rusiya, Çin və Avropa İttifaqı kimi qlobal güclərlə əlaqələrin balanslaşdırılmasının vacibliyi də vurğulandı. Bu siyasət Azərbaycanın regionda və qlobal miqyasda sabitlik yaradan aktor kimi rolunu gücləndirir.

Azərbaycanın Qoşulmama Hərəkatına rəhbərliyi də bu kontekstdə xüsusi qeyd edilməlidir. Ölkəmiz pandemiya dövründə bu təşkilatın platformasında qlobal həmrəylik çağırışları etdi və praktiki təşəbbüslərlə çıxış etdi. Bu, Azərbaycanın beynəlxalq nüfuzunun daha da artmasına səbəb oldu.

Çoxşaxəli xarici siyasət Azərbaycanın həm iqtisadi, həm də siyasi maraqlarının təmin olunmasına xidmət edir. Enerji, nəqliyyat, humanitar və digər sahələrdə qurulan əməkdaşlıq münasibətləri ölkəmizin inkişafına mühüm töhfələr verir.Nəticə etibarilə, Azərbaycanın xarici siyasəti sabitlik, əməkdaşlıq və qarşılıqlı hörmət prinsiplərinə əsaslanır. Prezident İlham Əliyevin BMT-də verdiyi mesajlar da bunu bir daha təsdiqlədi.

Rəşad Rəsulov

YAP Şuşa rayon təşkilatının fəal üzvü