BMT Baş Assambleyasının 80-ci sessiyasında Prezident İlham Əliyevin çıxışında əsas diqqət çəkən mövzulardan biri Azərbaycanın sülh gündəliyi oldu. Qarabağ münaqişəsinin başa çatması ilə ölkəmiz artıq yalnız hərbi qələbə ilə kifayətlənməyib, həm də regionda yeni reallıqlar əsasında davamlı sülh quruculuğunu hədəfləyib. Dövlət başçısı çıxışında vurğuladı ki, Azərbaycan qalib ölkə olaraq revanşizmə yol açmır, əksinə qonşuları əməkdaşlığa dəvət edir. Bu, beynəlxalq hüquqa sadiq qalaraq, regionda sabitlik və inkişaf üçün atılan mühüm addımdır.

Azərbaycanın irəli sürdüyü sülh gündəliyi beş əsas prinsipə əsaslanır: ərazi bütövlüyünün qarşılıqlı tanınması, dövlətlərin daxili işlərinə qarışmama, beynəlxalq hüququn aliliyinə hörmət, qarşılıqlı əməkdaşlıq və sərhədlərin toxunulmazlığı. Bu prinsiplər yalnız Azərbaycan-Ermənistan münasibətlərinə deyil, bütövlükdə regionda yeni əməkdaşlıq modelinə zəmin yaradır. İlham Əliyevin sözlərinə görə, sülh müqaviləsinin imzalanması Cənubi Qafqazı qarşıdurmalar məkanından əməkdaşlıq məkanına çevirə bilər.Prezidentin səsləndirdiyi çıxışda beynəlxalq hüququn bərabər tətbiqi də xüsusi vurğulandı. Azərbaycan 30 ilə yaxın işğal dövründə beynəlxalq hüququn kobud şəkildə pozulduğunu yaşayaraq gördü. Lakin nəticədə özü beynəlxalq hüquqa əsaslanaraq ərazi bütövlüyünü bərpa etdi. Bu, həm region dövlətləri, həm də beynəlxalq ictimaiyyət üçün mühüm dərsdir. Əgər beynəlxalq qanunlar hamı üçün eyni şəkildə işləsəydi, münaqişə otuz il davam etməzdi.

Dövlət başçısının mesajlarından biri də ondan ibarət idi ki, Azərbaycan öz təcrübəsini dünya ilə bölüşməyə hazırdır. Çünki bu təcrübə yalnız müharibədə qələbə deyil, həm də sülhün qurulması, dağıdılmış ərazilərin bərpası və məcburi köçkünlərin geri qaytarılması kimi kompleks məsələlərin həllini əhatə edir. Bu, sülh quruculuğunun real modelidir.Azərbaycanın beynəlxalq hüquqa sadiqliyi həm də onun beynəlxalq təşkilatlarda aktiv fəaliyyətində öz əksini tapır. Ölkəmiz müxtəlif humanitar təşəbbüslərlə çıxış edir, regional əməkdaşlıq formatlarına dəstək verir və yeni əməkdaşlıq mexanizmlərinin yaradılmasında aparıcı rol oynayır. Bu, Azərbaycanın təkcə regionda deyil, qlobal miqyasda da sülh təşəbbüskarı kimi tanınmasına səbəb olur.

Nəticə olaraq, Azərbaycanın sülh gündəliyi təkcə bir dövlətin deyil, bütövlükdə regionun gələcəyini müəyyən edən strateji xəttdir. Prezident İlham Əliyevin BMT tribunasından səsləndirdiyi fikirlər göstərdi ki, Azərbaycan artıq yalnız öz torpaqlarını azad etmiş qalib ölkə deyil, həm də beynəlxalq hüquqa əsaslanan yeni regional nizamın qurucusudur.

Gülnar Qurbanova

YAP Şuşa rayon təşkilatının 22 saylı ərazi partiya təşkilatının sədri