Azərbaycanın beynəlxalq nəqliyyat dəhlizlərində oynadığı rol son illərdə daha da güclənib. Prezident İlham Əliyev BMT Baş Assambleyasındakı çıxışında ölkəmizin Şərq-Qərb və Şimal-Cənub dəhlizlərinin kəsişməsində yerləşən strateji mövqeyini xüsusi vurğuladı. Bu coğrafi üstünlük Azərbaycanı yalnız regional deyil, həm də qlobal səviyyədə logistika mərkəzinə çevirir.

Xəzərin ən böyük ticarət donanmasına sahib olan ölkəmiz, həmçinin Ələt Beynəlxalq Ticarət Limanı, Bakı–Tbilisi–Qars dəmir yolu və 9 beynəlxalq hava limanı ilə regionda analoqu olmayan infrastruktur sisteminə malikdir. Bu imkanlar sayəsində Azərbaycanın tranzit potensialı sürətlə artır. Son iki ildə Orta Dəhlizlə yükdaşımaların 90 faiz artması bunun bariz nümunəsidir.

Azərbaycanın təşəbbüsü ilə həyata keçirilən Bakı–Tbilisi–Qars, Şimal-Cənub və Transxəzər marşrutları beynəlxalq əməkdaşlığı möhkəmləndirən mühüm layihələrdir. Bu layihələr yalnız iqtisadi deyil, həm də siyasi baxımdan böyük əhəmiyyət daşıyır, çünki müxtəlif dövlətləri ortaq maraqlar əsasında birləşdirir.

Prezident çıxışında həm də “Rəqəmsal İpək Yolu” layihəsini xüsusi qeyd etdi. Xəzərin dibi ilə çəkilən qabaqcıl fiber-optik kabel şəbəkəsi Azərbaycanın rəqəmsal mərkəzə çevrilməsi üçün mühüm addımdır. Bu layihə ölkəmizi informasiya-kommunikasiya sahəsində də beynəlxalq qovşağa çevirir.

Bütün bu təşəbbüslər Azərbaycanın açıq dənizə çıxışı olmayan ölkə olmasına baxmayaraq, beynəlxalq nəqliyyat sistemində aparıcı mövqeyə yüksəlməsini təmin edir. Prezidentin vurğuladığı kimi, ölkəmiz artıq həm regionda, həm də qlobal səviyyədə etibarlı tranzit mərkəzidir.

Beləliklə, Azərbaycanın nəqliyyat siyasəti təkcə iqtisadi deyil, həm də geosiyasi dəyər kəsb edir. Bu sahədə əldə olunan uğurlar dövlətimizin beynəlxalq nüfuzunu möhkəmləndirir və əməkdaşlıq üçün yeni imkanlar açır.

Anar Əlizadə

YAP Şuşa rayon təşkilatının 14 saylı ərazi partiya təşkilatının sədri