Prezident İlham Əliyevin BMT Baş Assambleyasındakı çıxışında Azərbaycanın iqtisadi inkişafı da geniş yer aldı. Dövlət başçısı vurğuladı ki, ölkəmiz yoxsulluğu və işsizliyi tarixi minimuma endirib, iqtisadiyyatını şaxələndirib və qeyri-neft sektorunu gücləndirib.

Azərbaycanın maliyyə sabitliyi beynəlxalq reytinq agentlikləri tərəfindən də yüksək qiymətləndirilir. “Moody’s” və “Fitch” kimi aparıcı qurumların ölkəmizin reytinqini artırması iqtisadi siyasətin düzgünlüyünün göstəricisidir. Xarici borcun ÜDM-in cəmi 6,5 faizi qədər olması və valyuta ehtiyatlarının bu borcdan 16 dəfə artıq olması Azərbaycanın maliyyə sabitliyini təsdiqləyir.

Prezident çıxışında həmçinin azad edilmiş ərazilərdə həyata keçirilən “Böyük Qayıdış” Proqramının iqtisadi aspektlərinə də toxundu. Yeni infrastruktur, kənd təsərrüfatı və sənaye layihələri bölgənin sosial-iqtisadi inkişafını təmin edir və dayanıqlı inkişafın əsasını qoyur.

Azərbaycanın iqtisadi uğurları regional əməkdaşlıq layihələri ilə də möhkəmlənir. Enerji, nəqliyyat və rəqəmsal layihələr ölkəmizin beynəlxalq əlaqələrini daha da gücləndirir.

Dayanıqlı inkişaf modeli həm sosial rifahı, həm də ekoloji sabitliyi təmin etməyi hədəfləyir. Bu siyasət Azərbaycanın gələcək nəsillər üçün sabit inkişaf yolunu təmin etməsinə imkan yaradır.

Beləliklə, Azərbaycanın iqtisadi nailiyyətləri təkcə milli deyil, həm də qlobal miqyasda nümunə göstərilə biləcək uğurlardır. Prezidentin çıxışı da bunu bir daha təsdiq etdi.

Anar Cəbizadə

YAP Şuşa rayon təşkilatının 37 saylı ərazi partiya təşkilatının sədr