BMT Baş Assambleyasının 80-ci sessiyası çərçivəsində Azərbaycan və ABŞ münasibətləri xüsusi diqqət çəkdi. Prezident İlham Əliyevin çıxışı zamanı səsləndirdiyi mesajlar göstərdi ki, Vaşinqtonla Bakı arasında münasibətlər artıq ənənəvi əməkdaşlıqdan çıxaraq strateji tərəfdaşlıq mərhələsinə qədəm qoyub. Bu, yalnız enerji və təhlükəsizlik sahələrində deyil, həm də sülh quruculuğu və regional əməkdaşlıq istiqamətində özünü göstərir. ABŞ Prezidenti Donald Trampın sülh prosesində birbaşa iştirak etməsi isə bu əlaqələrin əhəmiyyətini daha da artırdı.

Azərbaycan–ABŞ münasibətlərində ən mühüm dönüş nöqtələrindən biri Vaşinqtonda imzalanan Birgə Bəyanat oldu. Bu sənəd yalnız iki ölkə arasında siyasi əməkdaşlığın deyil, həm də beynəlxalq hüququn və regional sabitliyin təmin edilməsinə dair ortaq mövqelərin təsbit edilməsi baxımından mühüm əhəmiyyət daşıyır. Prezident İlham Əliyev bu sənədi Azərbaycan xalqının maraqlarını qoruyan, regionda sülh və əməkdaşlıq üçün yol açan tarixi hadisə kimi dəyərləndirdi.

Enerji təhlükəsizliyi ABŞ-Azərbaycan münasibətlərində daima prioritet sahələrdən biri olub. Prezident İlham Əliyev çıxışında vurğuladı ki, Azərbaycan artıq Avropanın enerji təminatında mühüm tərəfdaşdır. ABŞ-ın dəstəyi ilə reallaşdırılan Cənub Qaz Dəhlizi layihəsi Avropanın enerji xəritəsini dəyişdi və Azərbaycanın strateji mövqeyini gücləndirdi. Bu, təkcə iqtisadi deyil, həm də siyasi baxımdan Azərbaycanı qlobal oyunçuya çevirdi.

Münasibətlərin strateji tərəfdaşlıq səviyyəsinə qalxmasında təhlükəsizlik məsələləri də mühüm yer tutur. Azərbaycan regionda sabitliyin təmin olunması üçün fəal siyasət yürüdür və terrorizmə, separatizmə qarşı mübarizədə ABŞ-la ortaq maraqlara sahibdir. Bu əməkdaşlıq təkcə regionla məhdudlaşmır, qlobal təhlükəsizlik məsələlərində də özünü göstərir.Azərbaycan və ABŞ arasında əməkdaşlıq humanitar sahədə də inkişaf edir. Təhsil, səhiyyə, mədəniyyət və texnologiya sahələrində həyata keçirilən layihələr iki ölkə xalqları arasında dostluğun möhkəmlənməsinə xidmət edir. Prezident İlham Əliyevin çıxışında vurğuladığı kimi, bu əməkdaşlıq yalnız dövlətlərarası deyil, həm də insanlararası münasibətləri gücləndirir.

Nəticə etibarilə, BMT Baş Assambleyasının 80-ci sessiyası göstərdi ki, Azərbaycan və ABŞ arasında münasibətlər yeni mərhələyə qədəm qoyub. Bu, regionda sülhün təmin edilməsi, enerji təhlükəsizliyi, qlobal sabitlik və humanitar əməkdaşlıq sahələrində mühüm perspektivlər açır. Azərbaycan artıq ABŞ-ın etibarlı tərəfdaşı kimi tanınır və bu tərəfdaşlıq gələcəkdə daha da möhkəmlənəcək.

YAP Şuşa rayon təşkilatının saylı ərazi partiya təşkilatının sədri

Nizami Şahvələdov