2020-ci il sentyabrın 27-də Ermənistanın genişmiqyaslı təxribatlarına cavab olaraq Azərbaycan Ordusu Ali Baş Komandan İlham Əliyevin rəhbərliyi ilə Vətən müharibəsinə başladı. Bu müharibə təkcə ərazi bütövlüyü uğrunda deyil, həm də xalqımızın milli qürurunun bərpası naminə aparıldı. Uzun illər işğal altında saxlanılan torpaqlarımızın azad edilməsi üçün atılan addım tarixi zərurət idi.

Prezident İlham Əliyev müharibənin ilk günlərindən dünya ictimaiyyətinə bəyan etdi ki, Azərbaycan öz ərazisində döyüşür və beynəlxalq hüquqa tam uyğun şəkildə ərazi bütövlüyünü bərpa edir. Onun siyasi iradəsi, diplomatik fəallığı və qətiyyətli mövqeyi xalqı daha da ruhlandırdı. Həm cəbhədə, həm də informasiya müharibəsində Azərbaycan əsl birlik nümayiş etdirdi.

44 gün davam edən müharibə ərzində Ermənistan ordusu ağır məğlubiyyətlərə məruz qaldı. Azərbaycan Ordusu Cəbrayıl, Füzuli, Zəngilan, Qubadlı, Kəlbəcər, Laçın rayonlarını və Şuşa şəhərini işğaldan azad etdi. Xüsusilə 8 noyabr 2020-ci ildə Şuşanın azad olunması müharibənin taleyini həll edən ən böyük qələbə oldu. Bu tarixi zəfər Ali Baş Komandan İlham Əliyevin dəmir iradəsi və ordumuzun şücaəti ilə qazanıldı.

Müharibə zamanı Ermənistanın dinc şəhərlərə raket hücumları, Gəncə, Bərdə və digər bölgələrdə dinc əhaliyə qarşı törətdiyi cinayətlər bir daha göstərdi ki, işğalçı dövlət terrorçu siyasət yürüdür. Prezident İlham Əliyev dəfələrlə beynəlxalq tribunadan çıxış edərək bu faktları diqqətə çatdırdı və ədalətin Azərbaycanın tərəfində olduğunu sübut etdi.

Azərbaycan xalqı bu müharibədə həm də milli birliyini nümayiş etdirdi. Cəbhəyə gedən könüllülər, arxa cəbhədə çalışan insanlar, həmçinin informasiya savaşında iştirak edən gənclər Ali Baş Komandanın ətrafında sıx birləşdilər. Bu, xalq-dövlət birliyinin ən bariz nümunəsi idi.

Beləliklə, 44 günlük Vətən müharibəsi Azərbaycan tarixində Zəfər səhifəsi yazdı. Prezident İlham Əliyevin rəhbərliyi ilə Azərbaycan Ordusu işğala son qoydu və BMT-nin qətnamələrinin icrasını təmin etdi. Bu qələbə xalqımızın əsrlər boyu davam edən mübarizəsinin bəhrəsi oldu.

İlham Həsənov

YAP Şuşa rayon təşkilatının 26 saylı ərazi partiya təşkilatının sədri