Azərbaycan Ordusunun 2023-cü ilin 19 sentyabrında başladığı antiterror tədbirləri qısa müddətdə böyük nəticələr verdi. Cəmi 23 saat 43 dəqiqə davam edən əməliyyat düşmənin on illər boyu qurduğu istehkamları darmadağın etdi. Bu, yalnız hərbi uğur deyildi, həm də dövlətimizin suverenliyinin tam bərpası idi.Əməliyyatın planlaşdırılması xüsusi peşəkarlıqla həyata keçirilmişdi. Kəşfiyyat nəticəsində düşmənin mövqeləri, yolları, mühəndis qurğuları əvvəlcədən müəyyənləşdirilmişdi. Azərbaycan Ordusu bu məlumatlardan maksimum istifadə edərək düşmənin komanda məntəqələrinə dəqiq zərbələr endirdi. Prezident İlham Əliyevin sözləri ilə desək: “Əməliyyat bir günə başa çatdı, çünki ordumuz yenilməzdir.”

Əməliyyat zamanı müxtəlif qoşun növləri arasında qarşılıqlı əlaqə yüksək səviyyədə təmin olundu. Hərbi Hava Qüvvələri havada üstünlük qazandı, artilleriya isə düşmənin müdafiəsini dağıtdı. Quru qoşunlarımız çətin relyefdə irəliləyərək strateji yüksəklikləri ələ keçirdilər. Bu, hərbi əməliyyatın taleyini həll edən əsas amillərdən biri oldu.Azərbaycan əsgərlərinin qəhrəmanlığı xüsusi qeyd olunmalıdır. Onlar ağır mühəndis istehkamlarına baxmayaraq, irəli atıldılar və düşməni geri çəkilməyə məcbur etdilər. Bu, xalqımızın iradəsini və əsgərlərimizin peşəkarlığını göstərirdi. Mülki əhali isə əməliyyatlardan qorundu, humanitar dəhlizlər açıldı, yardımlar təmin edildi.

Əməliyyatın nəticələri qısa müddətdə özünü göstərdi. Düşmənin 60-dan çox döyüş mövqeyi və yüzlərlə texnikası məhv edildi. Onlarla tank və artilleriya qurğusu qənimət götürüldü. Bu, Ermənistanın illərlə qurduğu hərbi potensialın bir gündə sıradan çıxarılması demək idi.Prezident İlham Əliyev xalqa müraciətində bu qələbənin əhəmiyyətini vurğuladı. Onun dediyi kimi, “separatçı rejimin kitabı bağlandı”. Bu, yalnız hərbi deyil, həm də siyasi nəticə idi – Qarabağda separatçılığa yer qalmadı. Azərbaycan dövləti bu gün bütün ərazilərinə tam nəzarət edir.

Nəticədə, 20 sentyabr 2023 Azərbaycan tarixinə qızıl hərflərlə yazıldı. Bu gün Dövlət Suverenliyi Günü kimi qeyd olunur. Xalqımızın birliyi, dövlətimizin gücü və ordumuzun peşəkarlığı sayəsində Azərbaycanın ərazi bütövlüyü tam bərpa edildi.

YAP Şuşa rayon təşkilatının 2 saylı ərazi partiya təşkilatının sədri:

Hidayət Səmədov