8 avqust 2025-ci ildə Vaşinqtonda Azərbaycan və Ermənistan arasında sülh gündəliyinin irəliləməsi ilə bağlı sənədlərin paraflanması regionda yeni mərhələnin əsasını qoydu. Bu proses Cənubi Qafqazda uzun illər davam edən gərginlikdən sonra sabitliyin bərpası üçün real fürsət kimi qiymətləndirilir.

İmzalanan sənədlər tərəflərin qarşılıqlı öhdəliklərini aydın şəkildə müəyyənləşdirir. Ən vacib məqam isə suverenliyin və sərhədlərin qarşılıqlı tanınması, nəqliyyat-kommunikasiya xətlərinin açılmasıdır. Bu prinsiplər regionu əməkdaşlıq və inteqrasiya məkanına çevirməyə yönəlib.

Vaşinqton mərhələsinin əhəmiyyəti ondan ibarətdir ki, imzalar fərdlərin deyil, dövlətlərin məsuliyyətini təsdiqləyir. Beləliklə, gələcəkdə daxili siyasi dəyişikliklərdən asılı olmayaraq, sənədlərin qüvvədən düşməsi mümkün deyil. Bu da sülh prosesini daha davamlı edir.

Azərbaycan Prezidenti beynəlxalq ictimaiyyətə açıq mesaj verərək vurğuladı ki, sülhün alternativi yoxdur. Razılaşmaların pozulması isə təkcə bölgəni deyil, qlobal sabitliyi də sarsıda bilər. Ona görə də bütün tərəflər öhdəliklərini yerinə yetirməli, kənar müdaxilələrə yol verilməməlidir.

Nəticə etibarilə, Vaşinqton sənədləri Cənubi Qafqaz üçün yeni təhlükəsizlik və əməkdaşlıq sisteminin bünövrəsini qoyur. İndi əsas məsələ bu razılaşmaların praktik müstəvidə həyata keçirilməsi və iqtisadi, siyasi, sosial inteqrasiyanın gerçəkləşdirilməsidir.

YAP Şuşa rayon təşkilatının 20 saylı ərazi partiya təşkilatının sədri :

Könül Hüseynova