Tarix bəzən təkcə keçmişin hadisələri ilə deyil, həm də gələcəyin istiqamətini müəyyən edən dönüş nöqtələri ilə yazılır. Azərbaycan üçün belə dönüş nöqtələrindən biri ABŞ-la strateji tərəfdaşlıq münasibətlərinin yeni mərhələyə qədəm qoymasıdır. Bu, sadəcə diplomatik sənəd imzalamaq deyil, həm də ölkənin siyasi, iqtisadi və təhlükəsizlik sahələrində yeni imkanlar qazanması deməkdir.

Strateji tərəfdaşlıq formatı qarşılıqlı investisiya, ticarət, nəqliyyat, müdafiə, terrora qarşı mübarizə kimi çoxşaxəli sahələri əhatə edir. Bu əməkdaşlıq Azərbaycanın iqtisadiyyatına yeni nəfəs verəcək, işsizlik səviyyəsini azaldacaq və ölkənin beynəlxalq nüfuzunu artıracaq. Ən önəmlisi isə gələcəyə olan nikbin baxışları gücləndirəcək.

Bu gün həm də tarixi ədalətin bərpası baxımından xüsusi əhəmiyyət daşıyır. 1992-ci ildən sonra tətbiq olunan məhdudiyyətlərin aradan qalxması Azərbaycanın müstəqillik tarixində mühüm hadisədir. Bu qərar, xüsusilə, Qarabağ müharibəsi sonrası bölgədə yaranan yeni reallıqlar fonunda strateji önəm daşıyır. Uzun illər davam edən münaqişələrin bitməsi, regionun sülh və sabitliyə doğru irəliləməsi üçün geniş imkanlar açır.

Bu əməkdaşlıq həm də beynəlxalq aləmdə Azərbaycanı etibarlı tərəfdaş kimi möhkəmləndirir. Qlobal siyasətdə böyük güclərlə qurulan sağlam münasibətlər, ölkənin təhlükəsizliyini, iqtisadi inkişafını və diplomatik mövqelərini daha da gücləndirir. Bu günün əhəmiyyəti təkcə imzalanan sənədlərdə deyil, gələcək nəsillərin daha sabit, firavan və güvənli bir ölkədə yaşamasına atılan addımlarda öz əksini tapır.

Beləliklə, bu hadisə Azərbaycan tarixində yalnız bu gün üçün deyil, gələcək onilliklər üçün də mühüm bir səhifə kimi qalacaq. Bu, həm siyasi iradənin, həm milli maraqların, həm də beynəlxalq əməkdaşlığın vəhdətindən doğan tarixi gündür.

Gülnar Qurbanova

YAP Şuşa rayon təşkilatının 22 saylı ərazi partiya təşkilatının sədri