2025-ci il avqustun 8-də Azərbaycan Respublikasının Prezidenti İlham Əliyev, ABŞ Prezidentinin rəsmi dəvəti ilə Vaşinqtona səfər etdi. Bu görüş, Azərbaycan–ABŞ münasibətlərində mühüm dönüş nöqtəsi olmaqla yanaşı, bütövlükdə Cənubi Qafqaz regionunda siyasi sabitlik üçün əhəmiyyətli hadisə kimi tarixə düşdü. Səfər çərçivəsində imzalanan sənədlər və qəbul olunan qərarlar bölgədə uzunmüddətli sülh və inkişaf istiqamətində yeni imkanlar yaratdı. Prezident Əliyev çıxışında bu günü “Cənubi Qafqazda sülhün bərqərar olduğu gün” kimi qiymətləndirərək, bunun həm region, həm də dünya üçün mühüm fürsət olduğunu vurğuladı.

Vaşinqton səfərinin əsas nəticələrindən biri Azərbaycan Respublikası və Amerika Birləşmiş Ştatları arasında strateji tərəfdaşlığın inkişafı məqsədilə Strateji İşçi Qrupunun yaradılması barədə Anlaşma Memorandumunun imzalanması oldu. Bu sənəd iki ölkə arasında əlaqələrin daha da dərinləşməsinə xidmət edəcək və qarşılıqlı siyasi, iqtisadi və təhlükəsizlik əməkdaşlığında yeni səhifə açacaq. Bu təşəbbüs həmçinin Azərbaycan-ABŞ münasibətlərinin gələcək onilliklər üçün sabit və qarşılıqlı etimad əsasında inkişafına zəmin yaradır.

Avqustun 8-də keçirilən görüş çərçivəsində Azərbaycan Prezidenti İlham Əliyev və Ermənistanın Baş naziri Nikol Paşinyan ABŞ Prezidentinin iştirakı ilə Birgə Bəyannamə imzaladılar. Bu sənəd, Azərbaycan-Ermənistan sülh müqaviləsinin paraflanması istiqamətində mühüm addım kimi dəyərləndirilir. Bəyannamədə həmçinin ATƏT-in Minsk qrupunun ləğvi məsələsində iki ölkənin birgə müraciət edəcəyi təsdiqləndi. Sazişin yekun imzalanması üçün əsas şərtlərdən biri Ermənistan konstitusiyasının dəyişdirilməsi olaraq göstərildi ki, bu da ərazi iddialarının aradan qaldırılmasını nəzərdə tutur.

Birgə Bəyannamədə diqqətçəkən məqamlar arasında Azərbaycanın əsas hissəsi ilə Naxçıvan Muxtar Respublikası arasında maneəsiz gediş-gəlişin təmin edilməsi xüsusi yer aldı. Bu, illərdir gündəmdə olan Zəngəzur dəhlizinin açılması deməkdir. Sənəddə həmçinin “Beynəlxalq Sülh və Rifah naminə Tramp Marşrutu” adlanan xüsusi infrastruktur layihəsinin həyata keçiriləcəyi qeyd olundu. Bu layihə, Ermənistan ərazisindən keçərək Azərbaycan və Naxçıvan arasında iqtisadi, nəqliyyat və rabitə əlaqələrini gücləndirəcək.

Vaşinqton sammitində iki ölkənin xarici işlər nazirləri tərəfindən sülh müqaviləsinin mətni paraflandı. Bu, sənədin tərəflər arasında razılaşdırıldığını təsdiqləsə də, onun hələ imzalanmadığını göstərir. Planlaşdırıldığına görə, 2026-cı ildə Ermənistanda konstitusiya dəyişikliyi üzrə referendumdan sonra sülh sazişi rəsmi şəkildə imzalanacaq. Bu proses, 30 ildən artıq davam edən münaqişənin yalnız hərbi qələbə ilə deyil, həm də diplomatik və hüquqi əsaslarla tamamlanmasını təmin edəcək.

Prezident İlham Əliyevin Vaşinqtonda verdiyi bəyanat, Azərbaycanın sülh niyyətini açıq şəkildə ifadə edir. Onun sözlərinə görə, imzalanan sənədlər Cənubi Qafqazda uzunmüddətli sülh və sabitliyin qurulması yolunda mühüm addımdır. 8 avqust 2025-ci ildə baş tutan bu səfər, Azərbaycanın yalnız regional deyil, həm də qlobal miqyasda siyasi çəkisini bir daha nümayiş etdirdi. Ölkəmiz, milli maraqlarını qorumaqla yanaşı, beynəlxalq təhlükəsizlik və əməkdaşlığa da töhfə verən etibarlı tərəfdaş kimi mövqeyini möhkəmləndirdi.

Nazilə İbarhimova

YAP Şuşa rayon təşkilatının 3 sayl ərazi partiya təşkilatının sədri