Dil – xalqın kimliyi və mənəviyyatının daşıyıcısıdır. Heydər Əliyevin Türk dünyası yazıçılarının III qurultayında söylədiyi “Hər bir xalqın milliliyini, mənəvi dəyərlərini, mədəniyyətini yaşadan, inkişaf etdirən onun dilidir” fikri dərin məna daşıyır və dilin milli varlığımızdakı rolunu aydın şəkildə ifadə edir. Dil sadəcə ünsiyyət vasitəsi deyil, həm də bir xalqın tarixinin, düşüncə tərzinin, dünyagörüşünün, adət-ənənələrinin və mənəvi dəyərlərinin daşıyıcısıdır.

Millət kimi formalaşmaq və mövcudluğunu qorumaq üçün dilin yaşadılması və inkişaf etdirilməsi mühüm şərtdir. Bir xalqın dili unudularsa, onun mədəni irsi, düşüncə sistemi və milli kimliyi də tədricən silinər. Buna görə də dildə təbliğ olunan ədəbiyyat, sənət və elmi fikirlər xalqın mənəvi gücünü, əxlaqi əsaslarını möhkəmləndirir.

Heydər Əliyevin bu fikri, həm də bizə məsuliyyət yükləyir – dilimizi qorumaq, onu sevmək və gələcək nəsillərə saf şəkildə ötürmək bizim vəzifəmizdir. Xüsusilə yazıçılar, müəllimlər, alimlər və bütün ziyalılar bu missiyanı yerinə yetirməkdə ön sırada dayanmalıdırlar. Çünki dil yaşadıqca xalq yaşayır, xalq yaşadıqca da onun ruhunu, kimliyini əks etdirən mədəniyyət inkişaf edir.

Bu baxımdan Türk dünyasında ortaq dil köklərinə və mədəniyyətə malik olan xalqların birliyi üçün də dil mühüm körpü rolunu oynayır. Ortaq sözlər, ifadələr və dəyərlər bizi tarixən birləşdirdiyi kimi, bu gün də mədəni əməkdaşlıq və qarşılıqlı anlaşma üçün əsas zəmin yaradır. Heydər Əliyevin dilə bu qədər önəm verməsi təkcə milli kimliyi qorumaq məqsədi daşımırdı, həm də Türk xalqları arasında mənəvi bağları gücləndirmək niyyətindən qaynaqlanırdı.

Azərbaycan dili bu gün yalnız ölkə daxilində deyil, eyni zamanda beynəlxalq səviyyədə də tanınır və öyrənilir. Bu isə dövlətin apardığı məqsədyönlü siyasətin, xüsusilə də Ulu Öndər Heydər Əliyevin dil siyasətinin nəticəsidir. Onun təşəbbüsü ilə qəbul olunan “Dövlət dili haqqında” Qanun, Azərbaycan dilinin inkişaf strategiyasına çevrildi və müstəqillik dövründə dilimizin mövqeyinin möhkəmlənməsinə xidmət etdi.

Bu gün bizə düşən əsas vəzifə – bu irsi qorumaq və zənginləşdirməkdir. Gənc nəsillərə dil sevgisini aşılamaq, onları öz ana dilində düşünməyə, yazmağa və yaradıcılıqla məşğul olmağa həvəsləndirmək vacibdir. Dilin saflığını qorumaq, onu yad təsirlərdən müdafiə etmək isə hər bir vətəndaşın milli borcudur.

Validə Məmmədova

YAP Şuşa rayon təşkilatının fəal üzvü