III Şuşa Qlobal Media Forumunda Azərbaycanın geostrateji mövqeyi və logistika potensialı da əsas müzakirə mövzularından biri kimi çıxış etdi. Prezident İlham Əliyev çıxışında Azərbaycanın regionun əsas nəqliyyat və tranzit mərkəzlərindən birinə çevrildiyini vurğuladı. Bu, ölkənin beynəlxalq ticarət və iqtisadi əməkdaşlıq sahəsində artan əhəmiyyətini göstərir.

Azərbaycanın təşəbbüsü ilə inkişaf etdirilən Orta Dəhliz layihəsi – Çin, Qazaxıstan, Özbəkistan, Türkmənistan, Azərbaycan, Gürcüstan, Türkiyə və Avropanı birləşdirən strateji marşrut – ölkəmizin qlobal yükdaşımalarda əsas rolunu daha da möhkəmləndirir. Bu marşrut yalnız iqtisadi deyil, həm də siyasi əhəmiyyət daşıyır.

Bakı-Tbilisi-Qars dəmir yolu xətti və Bakı Beynəlxalq Dəniz Ticarət Limanı bu sistemin əsas sütunlarıdır. Azərbaycanın logistik imkanları nəinki Qafqazda, hətta bütövlükdə Avrasiya məkanında rəqabət qabiliyyətli mövqeyə sahibdir. Bu infrastruktur ölkəmizi qitələrarası daşımaların ayrılmaz halqasına çevirib.

Ermənistanın Zəngəzur dəhlizi ilə bağlı hərəkətsiz qalması, onun regional inteqrasiyada geri qalmasına səbəb olub. Bu isə bir daha göstərir ki, konstruktiv əməkdaşlıqdan imtina edən ölkələr iqtisadi və geosiyasi baxımdan uduzan tərəfə çevrilirlər.

Azərbaycanın tranzit siyasəti təkcə iqtisadi məqsədlərə deyil, həm də regional sabitliyin təmin edilməsinə xidmət edir. Çünki nəqliyyat əməkdaşlığı ölkələr arasında qarşılıqlı asılılıq və etimad yaradır. Şuşada bu aspektin müzakirəsi Azərbaycanın strateji baxışının nə qədər geniş olduğunu göstərdi.

Beləliklə, III Şuşa Qlobal Media Forumu təkcə media və informasiya deyil, həm də enerji, nəqliyyat və rəqəmsal inkişaf kimi çoxşaxəli sahələrdə Azərbaycanın artan rolunu dünyaya nümayiş etdirdi.

Aynurə Məlikova

YAP Şuşa rayon təşkilatının 25 nömrəli ərazi partiya təşkilatının sədri