Müasir dövrün ən aktual və qlobal problemlərindən biri iqlim dəyişmələridir. Bu məsələ artıq yalnız elmi və texnoloji müzakirələrin deyil, eyni zamanda siyasi və sosial debatların da əsas mövzusuna çevrilmişdir. Belə bir şəraitdə Azərbaycanın bu problemlə bağlı beynəlxalq səviyyədə apardığı təşəbbüslər və atdığı addımlar, xüsusilə də Prezident İlham Əliyevin III Şuşa Qlobal Media Forumundakı çıxışı fonunda bir daha gündəmə gəlmişdir.

Forumun məhz Şuşa şəhərində – Azərbaycanın işğaldan azad olunmuş qədim mədəniyyət mərkəzində keçirilməsi rəmzi və siyasi baxımdan böyük əhəmiyyət kəsb edir. Bu, həm ölkənin yenidənqurma gücünü göstərir, həm də Qarabağın bərpası ilə bağlı qlobal diqqəti cəlb edir. Şuşada keçirilən tədbirin məqsədi təkcə medianı və jurnalistikanı müzakirə etmək deyildi. Burada dünya miqyasında mühüm mövzulara – iqlim dəyişikliyinə, yaşıl enerjiyə keçidə və ekoloji məsuliyyətə də toxunuldu.

Azərbaycanın COP29 kimi mötəbər bir iqlim tədbirinə ev sahibliyi etməsi təsadüfi deyil. Bu, Azərbaycanın ekoloji məsələlərə ciddi yanaşdığını və bu sahədə liderliyə iddialı olduğunu göstərir. Prezident İlham Əliyevin forumdakı çıxışında qeyd etdiyi kimi, ölkə artıq Günəş və külək enerjisinə böyük sərmayələr yatırır, Qarabağ və Şərqi Zəngəzurda yaşıl enerji zonaları yaradılır. 280 meqavat gücündə elektrik stansiyalarının istifadəyə verilməsi, yaxın illərdə bu sahədə daha böyük hədəflərin olması Azərbaycanın yaşıl gündəliyinin nə qədər geniş və real olduğunu göstərir.

Eyni zamanda, Prezident çıxışında inkişaf etməkdə olan kiçik ölkələrin iqlim dəyişikliyi ilə mübarizədə daha çox dəstəyə ehtiyac duyduğunu vurğuladı. Bu, beynəlxalq ədalətin bir çağırışıdır: hamı eyni risklə üz-üzədir, amma hamının imkanları bərabər deyil. Ona görə də, ekoloji problemlərin həlli üçün həmrəyliyə və beynəlxalq əməkdaşlığa ehtiyac var.

Azərbaycan həm coğrafi, həm də siyasi baxımdan bir körpü rolunu oynayır – Şərqlə Qərbi, inkişaf etmişlə inkişaf etməkdə olan ölkələri birləşdirən bir mövqedə dayanır. Bu mövqe ona yalnız diplomatik deyil, həm də ekoloji sahədə təşəbbüslərlə çıxış etmək üçün fürsətlər yaradır. Bütün bunlar göstərir ki, Azərbaycanın “yaşıl gələcək” istiqamətində atdığı addımlar təkcə ölkənin deyil, həm də regionun və dünyanın sabitliyi və rifahı üçün mühüm əhəmiyyət daşıyır.

Gülnar Qurbanova

YAP Şuşa rayon təşkilatının 22 saylı ərazi partiya təşkilatının sədri