Azərbaycanın mədəniyyət beşiyi Şuşa şəhərində keçirilən III Qlobal Media Forumu, ölkəmizin beynəlxalq informasiya siyasətində artan rolunu bir daha nümayiş etdirdi. Tədbirə 52 ölkədən 140-a yaxın nümayəndənin qatılması, onun qlobal əhəmiyyətini təsdiqlədi. Forum çərçivəsində jurnalistikanın çağdaş problemləri və beynəlxalq media əlaqələrinin gələcəyi geniş şəkildə müzakirə olundu.

Forumun əsas müzakirə mövzularından biri dezinformasiya ilə mübarizə idi. Rəqəmsal dövrdə informasiya mənbələrinin keyfiyyəti və etibarlılığı strateji əhəmiyyət kəsb edir. Azərbaycan, informasiya təhlükəsizliyini milli prioritetə çevirərək, qlobal media strukturları ilə əməkdaşlıq imkanlarını genişləndirir.

Forumda çıxış edən Prezident İlham Əliyev Azərbaycanın inkişaf trayektoriyasını, xarici siyasətini və media sahəsindəki çağırışlara yanaşmasını əhatəli şəkildə təqdim etdi. Dövlət başçısının nitqi, ölkənin daxili və xarici siyasətində şəffaflığın və açıq dialoqun əsas prinsip olduğunu göstərdi.

Eyni zamanda, süni intellekt və rəqəmsal transformasiya mövzuları da aktuallığını qorudu. Media nümayəndələri bu sahədə texnologiyaların jurnalistikaya təsiri və etik çərçivələrin necə müəyyən olunmalı olduğu barədə fikir mübadiləsi apardılar. Forum bu sahədə ortaq əməkdaşlığın zəruriliyini vurğuladı.

Bütövlükdə, Şuşa Qlobal Media Forumu Azərbaycanın yeni media strategiyasını, beynəlxalq informasiya axınındakı mövqeyini və qlobal çağırışlara cavab vermək potensialını uğurla nümayiş etdirdi. Bu tədbir, ölkəmizi qlobal informasiya diplomatiyasının mərkəzlərindən birinə çevirmək yolunda atılmış növbəti mühüm addım oldu.

Hidayət Səmədov

YAP Şuşa rayon təşkikatının 2 saylı ərazi partiya təşkilatının sədri