Azərbaycan milli mətbuatı zəngin tarixi və şərəfli inkişaf yolu ilə bu gün yeni mərhələyə qədəm qoyur. Müstəqillik dövründə əldə edilən nailiyyətlər, xüsusilə informasiya texnologiyalarının sürətli inkişafı medianın funksiyalarını daha da genişləndirib. Müasir informasiya cəmiyyətində medianın rolu təkcə məlumat yaymaqla məhdudlaşmır – o, həm də maarifləndirir, tərbiyələndirir, ictimai fikri formalaşdırır.Azərbaycan Respublikasının Prezidenti cənab İlham Əliyevin rəhbərliyi ilə həyata keçirilən informasiya siyasəti medianın daha çevik, peşəkar və milli maraqlara xidmət edən quruma çevrilməsini təmin edib. Prezidentin media sahəsinə diqqət və qayğısı həm qanunvericilik təşəbbüslərində, həm də yaradılan müasir infrastrukturda özünü göstərir.

Bu səbəbdən, medianın qarşısında duran əsas vəzifələrdən biri milli həmrəyliyin, sosial ədalətin, şəffaflığın və dözümlülüyün təbliğidir. Media həm də demokratik dəyərlərin, siyasi mədəniyyətin və hüquqi şüurun inkişafında mühüm rol oynamalıdır. Xüsusən də müasir dövrdə dezinformasiya və saxta xəbərlərlə mübarizə, informasiyanın obyektivliyinin qorunması əsas prinsiplər sırasındadır.Azərbaycan mediası öz peşə fəaliyyətində qərəzsizlik, obyektivlik, milli maraqlara sadiqlik və vətənpərvərlik kimi meyarlara sadiq qalmalıdır. Bu prinsiplər həm cəmiyyətin dövlətə inamını qoruyur, həm də ölkənin informasiya təhlükəsizliyini təmin edir.

İşğaldan azad olunmuş ərazilərdə aparılan genişmiqyaslı bərpa və inkişaf işləri medianın bu bölgələrlə bağlı düzgün və dolğun məlumat yaymasını da zəruri edir. Bu, həm yerli, həm də beynəlxalq ictimaiyyətin məlumatlandırılmasına xidmət edir.

Beləliklə, Prezident İlham Əliyevin rəhbərliyi ilə formalaşan milli informasiya siyasəti Azərbaycanın media mühitində yeni keyfiyyət mərhələsi yaratmış və medianın cəmiyyətə verdiyi töhfəni daha da artırmışdır.

YAP Şuşa rayon təşkilatının 20 saylı ərazi partiya təşkilatının sədri : Könül Hüseynova